Oh, suoi ben iò / chel fantassùt descòls / ch’ al ziva grava / a fâ penàcius!
Chel fantassùt al è Renato Appi, nassût a Cordenons ai 15 di Avrîl dal 1923.
Al à scomençat a scrivi teatri, prin par talian e po te sô varietât di furlan, a pene tornât de presonie in Gjermanie, dal 1943 al 1944.
La sô bisugne di scrivi e jere profonde: tai agns Cincuante e Sessante i siei lavôrs, simpri impegnâts e inlidrisâts te sô interioritât, a àn vinçût diviers premis de Filologjiche.
Ancje lis sôs prosis e poesiis, tantis voltis sentimantâls, di bot espressionistichis, a prestin la vôs al dolôr dal om, ancje se cualchi volte al somee che a saltin fûr de sensibilitât di un frut.
Appi al doprave un furlan estrôs e svariât, plen di mûts di dî, che al fâs capî ancje lis sôs competencis te culture popolâr; al à colaborât al Atlant linguistic furlan, dadis dongje lis zontis al Nuovo Pirona par Budoie e pe Val Celine, tiradis sù lis contis de int dai paîs di là de aghe, e si è interessât ancje di pietât popolâr, judât in dut chest de femine, la mestre Elvia Moro.
Par tancj agns vicepresident de Filologjiche pal Friûl di là dal Tiliment, al è muart a Pordenon ai 30 di Otubar dal 1991.