Si sierin cuntun apontament dedicât al vin, ae filosofie e ae poesie, lis Seradis cul autôr a Gonârs par cure dal Assessorât ae culture, in colaborazion cun Biblioteche civiche, associazion ViF e cul Sportel associât pe lenghe furlane, gjestît de Societât Filologjiche Furlane.
Il protagonist dal incuintri di joibe ai 14 di Novembar, aes 8 di sere, li di "Stappo wine & food" al è Matteo Bellotto, scritôr e consulent pai Consorzis "Friuli Colli Orientali e Ramandolo" e "Doc-FVG", ideadôr de Tasting Academy, premi ricuart Isi Benini 2023 e autôr di Storia di vino e di Friuli Venezia Giulia, Di terra e di vino (ducj i doi par "Biblioteca dell'Immagine") e Pôre di nuie (Kappa Vu).
Plui che une presentazion di libris, e sarà la ocasion par cerçâ Tiere, animis, segrets e vin. Un viaç dentri dal Friûl plui font, li che il cidinôr des personis e la vôs dal vin si sparnicin tra cjamps e ostariis. Storiis di vin che a durin il timp di un tai, il timp che ognidun di noaltris si permet par scoltâ e par fevelâ, come che al sucêt ducj i dîs tai bars dai nestris paîs.
Jentrade libare.