Inte suaze dal festival "Calice d'autore 2022", promovût dal Comun di Caprive, o vin il plasê di invidâUs a la presentazion dal romanç di Gianluca Franco vincidôr dal Premi leterari "San Simon" tal 2018 e publicât de Societât Filologjiche Furlane.
Al interven Walter Tomada.
La storie, di fantasie, si insede però suntun fat storic dramatic capitât te nestre tiere tai agns Setante, l’atentât dinamitart di Petean dai 31 di Mai dal 1972, là ch’a muririn i carabinîrs Donato Poveromo, Franco Dongiovanni e il brigadîr Antonio Ferrario. La sentenzie da la Cort di Cassazion, tal 1992, e stabilì purtrop l’implicazion di uficiâi e sotuficiâi dai carabinîrs tal mascarament dai responsabii dal atentât. Cun cheste motivazion la Jurie e assegnave il Premi San Simon 2018 a cheste vore: «Romanç interessant, spieli e denunzie di une gjenerazion, chê dai agns ’70, che si fruçone in 4-5 storiis ingredeadis une cun chê altre [...]. I personaçs a son disegnâts cun cure, dispès il particolâr al devente simbul di une situazion plui slargjade, la lenghe furlane si displee in dutis lis sôs pussibilitâts sintatichis e lessicâls, e la division paragrafiche de conte e jude une vore a sclarî il plan di leture».
Gianluca Franco al è nassût a Gurize tal 1969 e di simpri al vîf a Caprive. Al à publicât cu la Clape Culturâl Aquilee i romançs storics «Re Ricard in Friûl» (2012) e «Il buinç» (2015), e cu la Societât Filologjiche Furlane la racuelte di contis «Plaidarts» (Premi San Simon 2016) e i romançs «Silvie te Catedrâl di Taragone» (Premi San Simon 2018), See the Sky about to Rain / Balade pai timps di ploie (Premi San Simon 2020) e «Une storie sole» (Premi San Simon 2022). Dal prin romanç al à gjavât fûr, dutun cul compositôr Fabio Rivolt, la cjantade in re minôr par vôs e orchestre «Cussì sul scurî de dì di Tomuç» che e à vût il premi dal public tal concors Premi Friûl 2013. Cu lis sôs contis al à vinçût ancje i concors "Vôs de basse" e "Zâl par furlan".