In ocasion de “Fraie de vierte”, la Filologjiche Furlane e da fûr un numar speciâl de riviste «Sot la Nape» dedicât ai paîs di Sedean, Flaiban e Merêt di Tombe. Lis presentazions a saran usgnot a San Durì di Flaiban (Sale de canoniche aes 20.45), doman a Merêt (Sale consiliâr aes 20.30) e domenie a Sedean (al Teatri Clabassi aes 11 di buinore). Il troi ch’o vin pensât di cjapâ par meti jù chest speciâl di «Sot la Nape» al è stât chel di marcâ la ricjece e la diversitât culturâl dal nestri teritori tal ambit archeologjic, tal chel leterari, artistic, politic, musicâl, teatrâl, gleseastic, storic. Une operazion fondamentâl e je stade metude in pîts di don Carlo Rinaldi tai agns ’80. Mediant di intervistis al veve regjistrât lis vôs de int ch’e veve scjavaçât scuasit dut il Nûfcent, scandaiant lis usancis, lis tradizions, lis vueris passadis, lis emigrazions, publicant 4 volums: nus fâs un struc. Si continue a fevelâ di Tiziano Tessitori, un furlan vêr, chel ch’al jere stât un profete par l’avignî de nestre regjon (l’idee autonomiste di 70 agns indaûr). La pene che si è incargade di fevelânt e je chê di Gianfranco Ellero. Raffaella Beano cul so contribût e presente la vôs di Plinio Clabassi, un artist che si veve fat cognossi tai teatris plui impuartants dal mont pes sôs capacitâts interpretativis in oparis lirichis dai plui innomenâts autôrs. Pai cent agns de nassite di pari David Maria Turoldo no podevin no rimarcâ insot la sô vôs di inteletuâl, di profete, di leterât e ancje di vôs “scomude”. Su cualchi aspiet dai siei orizonts culturâi nus scrîf bons. Nicola Borgo. Chel ch’al è lât indaûr a lis lidrîs de nestre Glesie Mari di Aquilee al è stât pre Gilberto Pressacco: Angelo Vianello al marche la straordinarietât des sôs intuizions e il model di scandai inovatîf metût in vore di pre Gilberto, chel da la ricercje interdissiplinâr. L’art dal teritori e je stade scrusignade di Maristella Cescutti. Di Agnul di Spere (Pitane) nus scrîf il so amì Roberto Iacovissi. Al fevele des sôs traduzions, de sô poesie “sientifiche”, di ricercje de “piere miôr” tal tesaur de gjave des lenghis romanzis. Vignût a mancjâ di pôc, cun Gianfranco Plenizio il Friûl al à pierdût un dai mestris plui rapresentatîfs e ricognossûts; di lui nus conte Roberto Calabretto. Un altri che si à fat onôr ator al è Glauco Venier, che di lui al scrîf l’amì fraterni Nicola Cossar: dal grant lavôr di Glauco, in particolâr di chel jazzistic, nus reste la sô capacitât di maraveânus, di emozionânus e di comovinus, ch’a son espression dal so talent e de sô anime di artist. A àn emozionât, ma soredut divertît dut il Friûl chei dal Teatro Incerto: Fabiano Fantini, Claudio Moretti e Elvio Scruzzi. Il sens dal assurt, il moment paradossâl, la sgrifignade di satire sociâl a son i trats peculiârs dal lôr impegn tal teatri, come che nus contin Mauro Daltin e Alessandro Venier. Une analisi interessant sul furlan concordiês e su chel aquileiês fevelâts ta la comunitât le fâs Giovanni Frau. Contribûts aprofondîts su l’archeologjie nus vegnin di Elisabetta Borgna e Susi Corazza, e su la protostorie e la ete romane di Tiziana Cividini. Il Cjastelêr, dopo di passe 3500 agns, al è ancjemò li, unic e intîr monument che nus fevele dai nestris basavons. La storie e ven po tratade in curt (Gotart Mitri) suntun pâr di fats avonde significatîfs: la batae dal Tiliment, ultime de campagne d’Italie di Napoleon (1797) e l’an tragjic de invasion austro-ungariche (1917) dopo de ritirade di Cjaurêt. Il teritori sot l’aspiet de economie lu scandae Mario Banelli, cuntune leture dai savoltaments dai ultins 60 agns, par rivâ a l’atualitât cuant che no si capìs ben ce che o vin pierdût e ce che o vin guadagnât. Un esempli cuintri curint, par fortune, e je la Latarie di Coder (Leonardo Marigo), un esempli di capacitât agregative fûr dal comun tal panorame “individualistic” in Friûl, un esempli autentic di lavôr, di sacrifici ch’a àn lidris in cheste comunitât. E il mont di une volte, la muse de civiltât contadine nus restin, mancul mâl, ta lis imagjinis fermadis de talentuose cineprese di Romano Remigio, che di lui nus scrîf Pier Giuseppe Di Lenarda. Insom, il mont des associazions, vivis e propositivis in dutis lis declinazions al è rapresentât de Somsi (Giocondo Venier) e de Associazion “Armonie” (Luigino Rinaldi). Si à cirût insome di dâ une cercje sui esprits libres, di chescj si trate, ch’o vin menzionâts disorevie, ch’o sin braurôs di sei de stesse tiere e ch’a son espression di une comunitât cetant feconde sot l’aspiet culturâl.
Gotart Mitri
«Messaggero Veneto», 09.05.2017