Vincj agns: cetancj a son passâts di chel vinars ai 22 di Març dal 1996, cuant che il Consei regjonâl dal Friûl-Vignesie Julie al à votât la leç 15, che pe prime volte inte normative de Republiche taliane e intervignive in pro de lenghe furlane.
A dî la veretât, il prin ricognossiment juridic dal furlan tant che lenghe al jere dentri de leç su la ricostruzion daspò dal taramot (n. 546 dai 8 di Avost dal 1977), ma cuntun lessic une vore intorteât si diseve dome che i spietave ae Universitât di Udin di «deventâ organic imprest di svilup e rignuviment dai filons origjinâi de culture, de lenghe, des tradizions e de storie dal Friûl», cence mutivâ altri. Invezit, la leç regjonâl e specificave i cercins dulà che si veve di intervignî: la grafie, la toponomastiche, la stampe, i spetacui, la radio e la television, la scuele, lis aministrazions, la Universitât e vie indenant, inmaneant un organisim specific (OLF) par judâ la Regjon a meti in vore ad in plen la leç. Pal so cont, ancje il Stât al à tacât a movisi, rivant a dâ contignûts al articul 6 de Costituzion (passâts 51 agns de sô prumulgazion!) cuntune leç dai 15 di Dicembar dal 1999, la numar 482, in pro des lenghis des minorancis, cun dentri, come che al è naturâl, ancje il furlan. La 15 e la 482 a jerin lis suazis: lis scuelis, i comuns, lis provinciis, lis associazions, i citadins a scugnivin jemplâ i telârs cun progjets, ideis, studis, iniziativis.
Al è stât cussì, a son stadis fatis ancje robis di valôr, siben che masse int e à tratât il furlan a un nivel dialetâl, par vie che un toc impuartant dai finanziaments al è rivât a ploie a poesiutis, contutis, cjantutis, fiestutis e sagrutis, a clapis e sociis nassudis dal moment. Al mancjave un plan unitari, globâl e coerent, vâl a dî il sfuarç di programâ e meti sù une politiche linguistiche, cun progjets plurienâi e orghins di verifiche dai risultâts. A van ben lis poesiis, a van ben i spetacui e lis fradaiis, ma dentri di un disen dulà che i fruts a doprin il furlan intes scuelis cun regolaritât, che al devente un fat normâl fevelâ par furlan in public e in famee, che dut l’ambient al è braurôs di vê e di «vivi» cheste lenghe.
Di fat, il spirt di chestis normis (la n. 15 e la n. 482) al jere chel di tutelâ, prudelâ, valorizâ il furlan e lis altris lenghis di minorance, par mantignîlis vivarosis e stuzigâ e ingolosî la int a fevelâlis. L’impuartant al è mostrâ che il furlan, il ladin, l’ocitan e vie indenant no son mancul dal talian, Un telegjornâl par furlan, une pagjine di un sfuei par furlan, une tabele cuntun non di paîs par furlan, un discors intun consei comunâl par furlan a pandin la pari dignitât jenfri lis lenghis.
E in efiets, la Regjon Friûl Vignesie Julie e à ben pensât che al jere rivât il moment di riformâ la 15/1996. Dopo un pâr di agns di discussions, il Consei al fasè buine une gnove leç, la numar 27 dai 18 di Dicembar dal 2007, sedi par jessi in cunvigne cu la 482, sedi - e soredut - par meti in vore dutis lis competencis che a son dentri dal Statût di autonomie e scomençâ a vê une sô politiche linguistiche, a traviers la Agjenzie Regjonâl pe Lenghe Furlane, la Filologjiche, la Universitât, lis scuelis e altris entitâts.
Ma dal Fevrâr dal 2008 il guvier Berlusconi al à impugnât la leç regjonâl, domandant ae Cort Costituzionâl di discancelâ un pôcs di articui, in pratiche cu la motivazion che la Regjon si jere imparonade di facoltâts statâls. Ai 18 di Mai dal 2009 la Cort e stabilive che cualchi come dai articui de leç no jerin legjitims, ma l’implant gjenerâl al restave (no fevelìn ca dai aspiets politics e istituzionâi de sentence, che a tocjin i rapuarts Stât/Regjons, studiâts e scrusignâts di juriscj e professôrs universitaris).
Passadis chestis burascjadis e stabilidis lis competencis dal Stât e de Regjon, o podìn fâ un belanç. Cu la leç 15 si à tacât a lavorâ e lis realizazions o rivìn a viodilis: spazi pal furlan intes radios e televisions (pôc ancjemò inte RAI), inte stampe, intes istituzions; o vin une grafie unitarie e un grant dizionari; plui di cualchi sît di internet al è par furlan o ben bilengâl; ents teritoriâi (Regjon, Provinciis, Comuns) a comunichin cu la popolazion ancje par furlan; intes scuelis il furlan al è doprât. Si capìs che chest al ven fûr no dome de leç 15 ma ancje de 482/1999 e de 27/2007, ma la 15 e à viert la strade. E il viaç al è a pene partît, parcè che la strade e je lungje!
Pier Carlo Begotti
Une taule taronde su “Lenghe furlane e autonomie” intai vincj agns de leç regjonâl 15 – publicade juste ai 22 di Març dal 1996 – si tignarà vuê aes 5 e mieze sore sere intal Teatri Arrigoni in Place dal Popul a San Vît dal Tiliment. L’iniziative e je promovude dal Comun di San Vît e de Societât Filologjiche, inte suaze des manifestazions pe Fieste de Patrie dal Friûl metudis adun de ARLeF – Agjenzie Regjonâl pe Lenghe Furlane. Moderâts di William Cisilino, a cjaparan part ae taule taronde Gianni Torrenti, Assessôr regjonâl ae culture, Sergio Cecotti, za President de Regjon autonome Friûl Vignesie Julie, Giovanni Frau, za President dal Osservatori regjonâl de lenghe e de culture furlanis, Lorenzo Fabbro, President de ARleF e Michele Gazzola de Universitât Humboldt, Berlin.