Al è un apontament tradizionâl par dute la Furlanie, il Congrès, une tradizion simpri gnove e un plasê chel di cjatâsi come in famee, par cognossi miôr la nestre tiere, par presentâ ce che la Societât Filologjiche e à fat, ce ch’e je daûr a fâ, e ce ch’al è di fâ pal doman.
In chê ocasion si presente il "Numar Unic", ven a stâi un volum che al cjape dentri cetancj contribûts di caratar storic, lenghistic, artistic, leterari e sociâl che a àn ce fâ cu la localitât che e da acet al Congrès: la golaine dai "Numars Unics" e je une schirie fondamentâl di studis che, un an dopo chel altri, a insiorin la culture furlane (
Par jentrâ tal catalic dai Numars Unics frache achì).
Il Congrès sociâl numar 101 si è davuelt domenie ai 6 di Otubar dal 2024 a Cuncuardia, erede de antighe Julia Concordia, municipi roman prime e plui tart sede vescovîl, sûr di Aquilee. La Filologjiche e je tornade jenfri la Livence e il Tiliment cuasi cuarante agns dopo de prime volte (Congrès di San Michêl dal Tiliment, 1985).
Il Congrès al è stât inmaneât in colaborazion cu lis Aministrazions comunâls di Cuncuadia e dai Comuns dal teritori di Puart. E à viert la zornade la Messe inte Catedrâl di Sant Stiefin Protomartar, biel che lis voris si son davueltis intal Municipi.
Dilunc dal Congrès al è stât presentât il
Numar Unic Cuncuardia,
rincurât di Franco Rossi e Luigi Zanin, che in passe 900 pagjinis al cjape dentri plui di 50 contribûts sul ambient, la archeologjie, la storie, l'art, lis biografiis, la lenghe e la societât dal teritori.