A son viertis lis iscrizions pe edizion 2026 dai Cors pratics di lenghe e culture furlane, inmaneâts de Societât Filologjiche Furlane cu la colaborazion fondamentâl dai Comuns dal Friûl e des associazions dal teritori.
Tai Cors pratics si studiin la gramatiche e la grafie de lenghe furlane, cun chê che si lei e si scrivi simpri di plui in marilenghe. Si fevele ancje dai aspiets storics, culturâi, leteraris e des tradizions popolârs. Propit cun chest fin, in armonie cui cors, si organizin lezions viertis (ven a stâi conferencis là che a puedin partecipâ ducj) e visitis guidadis in lûcs de regjon che a àn un interès storic e artistic particolâr.
Lis lezions, par un totâl di 26 oris, a son viertis a ducj, a gratis, cence limits di etât. Nol covente un titul di studi specific ni une cognossince preliminâr dal furlan, fûr che pai cors di nivel intermedi.
L'atestât di frecuence al ven dât a cui che al frecuente almancul il 70% des oris di lezion e al è titul culturâl par jentrâ te Liste regjonâl di insegnants cun competencis di lenghe furlane.
I Cors pratics di lenghe e culture furlane a son un progjet finanziât de ARLeF Agjenzie Regjonâl pe Lenghe Furlane e de Regjon Autonome Friûl - Vignesie Julie.
***
Cors in ativazion
- Cividât - la prime lezion e je stade ai 18 di Març. Il cors al continue ogni miercus des 5 aes 7 dopo misdì, in biblioteche, plaçute Chiarottini 6. Docent Adina Ruffini. Info biblioteca@cividale.net
- Ruvigne - il cors al è finît
- Sacîl - il cors al è finît
- Trivignan - il cors al è finît
- Tumieç - la prime lezion e je stade ai 2 di Març. Il cors al continue ogni lunis des 8 aes 10 di sere, te sale multimediâl di palaç Frisacco. Docente Serena Fogolini. Info cultura@comune.tolmezzo.ud.it; formazione@filologicafriulana.it
Altris cors a son in program cul mês di Setembar
Referent:
Elena De Sanctis
tel. 0432 501598, int. 3
formazione@filologicafriulana.it