CORS PRATIC DI LENGHE E CULTURE FURLANE IN LINIE LC1 NIVEL BASE
La Societât Filologjiche Furlane, cul finanziament de ARLeF - Agjenzie Regjonâl pe Lenghe Furlane, e à inviât tal mês di Fevrâr dal 2026 la setime edizion dal Cors pratic di lenghe e culture furlane in linie LC1 nivel base, su la fonde dai contignûts dal prin volum de golaine "Lenghe e culture" di Maria Chiara Visintin e Gabriele Zanello, dedicât a la storie dal Friûl.
Nol è un cors par principiants assolûts, si domande almancul la competence passive de lenghe furlane.
***
I Cors pratics di lenghe e culture furlane in linie a son struturâts su 4 nivei (principiants - base - intermedi - avanzât) che si disvilupin vie par dut l'an solâr. Ognidun dai cors al è propedeutic a chel sucessîf e si davuelç in 10 setemanis di ativitâts in modalitât asincrone, su plateforme Moodle (https://corspratics.filologicafriulana.it/), li che a son proponûts:
• videos e audios di introduzion al argoment de lezion;
• videos e di spiegazion des regulis di gramatiche;
• esercitazions di comprension dai tescj e de gramatiche;
• incuintris sincronis su plateforme Zoom, sù par jù di une ore ognidun, par stazâ lis capacitâts cul detât e la leture.
I materiâi didatics a son metûts su Moodle ogni setemane e a restin a disposizion in mût continuatîf, par che i partecipants a puedin davuelzi lis ativitâts dal cors in autonomie e tai oraris miôr. L'atestât di partecipazion si discjame a la fin dal percors formatîf e al è titul culturâl par jentrâ te Liste regjonâl di insegnants cun competencis di lenghe furlane. Il coordenament sientific al è di Ada Bier.
***
Cui che al vûl jessi metût te liste di spiete dai Cors di lenghe furlane, nivel principiants assolûts, cun lenghe veicolâr talian (L0 ITA), spagnûl (L0 ESP) o inglês (L0 ENG), in program dal mês di Setembar, al à di mandâ, par plasê, une email a formazione@filologicafriulana.it
Referent:
Elena De Sanctis
tel. 0432 501598, int. 3
formazione@filologicafriulana.it