La Societât Filologjiche Furlane e inmanee il concors une volte ogni doi agns par ricuardâ la figure e il lavôr di Andreina e Luigi Ciceri, cun chê di onorâ il lavôr che a àn fat a pro dal studi de storie e des tradizions des comunitâts dal Friûl. Luigi Ciceri (Tresesin, 1911-1981) al jere un miedi cu la passion des tradizions popolârs e de leteradure. Andreina Nicoloso Ciceri (Buie, 1920-Udin, 2000) e jere insegnante, etnolighe e critiche leterarie. A àn curât la publicazion di diviers volums di contis e di art popolâr, a àn inmaneât mostris e metût adun documentaris sul folclôr furlan.
Il premi al ven dât ai contribûts sientifics dedicâts ai aspiets de culture e dal teritori dal Friûl (storie, gjeografie, architeture rurâl, paisaç, turisim, economie pal disvilup dal teritori, tradizions popolârs e lenghistiche furlane) e al è dividût in dôs sezions: scrits (saçs libars, tesi di lauree magjistrâl e di dotorât ducj inedits) e materiâi multimediâi (documentaris, filmâts pe cognossince e la valorizazion dal Friûl, struments interatîfs).