E va indevant cuntun apontament par fameis la rassegne In file a Udin. Incontri tra cultura e tradizione te capitâl dal Friûl, inmaneade de Societât Filologjiche Furlane cul contribût dal Comun di Udin te suaze de manifestazion Udine Estate.
Sabide prin di Avost si podarà cognossi lis oparis di Zuanbatiste Tiepolo, lant daûr des pagjinis dal libri di Barbara Jelenkovich e Giovanna Zordan Il sium di Zuandomeni, a pene publicât de Societât Filologjiche Furlane in cinc lenghis (furlan, talian, sloven, todesc e inglês) e dedicât aes aventuris a Udin dal fi dal artist, il piçul Zuandomeni, intun viaç tra Cjistiel e Palaç Patriarcjâl, cun visite vuidade sore nuie.
Si cjatisi a 4 e mieze daspò misdì alì de Galarie di Art Antighe dal Cjistiel di Udin, che e vignarà esplorade cui voi di Zuandomeni, par dopo lâ indevant cu la visite intal Museu Diocesan e Galariis dal Tiepolo.
Pe ocasion, i grancj a podaran cjoli il biliet unic pe jentrade ai museus, al presit di 15 € (bon dal prin ai vot di Avost pe jentrade tal Cjistiel, Museu Diocesan e Galariis dal Tiepolo, Museu Etnografic dal Friûl), biel che pai visitadôrs cun mancul di 18 agns la cifre e je di 4 € (biliet bon pal Museu Diocesan e Galariis dal Tiepolo).
I puescj a son limitâts e daûr di prenotazion al numar 347 442 9515 (ancje WhatsApp).