Palaç Mantica

La sede di Udin de Societât Filologjiche Furlane e je tal Palaç Mantica, une dimore udinese dal secul XVI. Al è al numar 18 di vie Manin, in Borc di San Bartolomio, dongje de puarte Manin, che e faseve part dal tierç cercli di muris di Udin. Tal 1492 Nicolò Vanni Onesti i vendè il palaç ae famee Filettini. Tal 1543, po, i Filettini i passarin la proprietât de cjase a Giuseppe Manin. Cualchi an dopo, tal 1560, sô fie Faustina i puartà in dote il palaç a Pietro Mantica. Al fo cussì che il palaç al deventà proprietât di une famee lombarde che e jere rivade in Friûl cui Torians. I gnûfs parons a rinovarin architetonicamentri il palaç e i derin l’aspiet che si pues amirâ in dì di vuê. L’edifici al passà in ereditât di une gjenerazion a chê altre de famee di Nicolò Mantica, fin che Emilia, la sô ultime dissendente, tal 1890 sui maridà cul cont Andrea Caratti e i lassà il palaç a sô fie Maria Teresa, che tal 1966 jal vendè ae Filologjiche.
Dopo dal taramot dal 1976, si invià une prime fase di restaur dal Palaç Mantica, che e finì tal 1986 e  che e fasè saltâ fûr lis olmis di une storie une vore interessante. Di fat, la sede de Societât Filologjiche e à conservât la stesse struture che a vevin volût i Mantica te seconde metât dal Cinccent. La part architetonicamentri plui preseade e je la façade dal secul XVI, che e je elegante e suturne tal stes timp. Al prin plan si viôt une pentafore cuntun puiulut par bande e, tal mieç, une balustrade a fîl dal mûr. Propit sot de balustrade al è il rilêf de Madone cul Bambin e cherubins, opare di Carlo da Carona, fate tor dal 1520. Dentri dal palaç a son conservâts framents di afrescs de fin dal Cinccent. Simpri dal secul XVI al è ancje un sofit cun trâfs a viste e cantinelis. Lis decorazions in stîl Chinoiserie a son de fin dal Sietcent e i afrescs des salis dal prin plan a son dal Votcent. 

Fracant achì si puedin lei e discjamâ in maniere libare in formât pdf tancj contribûts gjavât des rivistis de Societât Filologjiche su la storie e sul patrimoni artistic dal Palaç.

Tal 2009 si à inviât une gnove fase di restaur e di manutenzion straordenarie dal palaç, par fâlu deventâ plui funzionâl e par recuperâ spazis pe biblioteche de societât. Intant di chescj intervents, tal mês di Lui dal 2009 a son stâts cjatâts reperts de ete protostoriche: a son saltâts fûr rescj dal sisteme di difese dal cjastilîr di Udin (il tiermin tecnic al è aggere, ven a stâi dal rivâl di tiere che al difindeve il paîs). Chescj rescj si puedin datâ de Ultime Ete dal Bronç (1400 p.d.C.), ma si à cjatât elements che a palesin che cheste zone e jere frecuentade za te Ete Miezane dal Bronç, ven a stâi tor dal 1700 p.d.C.
In plui, in gracie di chescj lavôrs si à podût cjatâ e valorizâ ancje une stanzie cul sofit a volt, fate in modon e clap, e une part des fondis dal edifici de Basse Ete di Mieç che al jere prime dal palaç di cumò.