Statût e Regolament

STATÛT de SOCIETÂT FILOLOGJICHE FURLANE
Fat bon de Assemblee Straordenarie dai Socis ai 7 di Març dal 2021

Titul I: DENOMINAZION E FINALITÂTS

ART. 1 -  Deniominazion
La “Societât Filologjiche Furlane Graziadio Isaia Ascoli A.P.S.”, fondade a Gurize ai 23 di Novembar dal 1919, stabilide in Ent Morâl cun R.D. ai 7 di Avost dal 1936, iscrite tal regjistri des personis juridichis de Prefeture di Udin al nr. 419 dai 17 di Fevrâr dal 2006, e promôf e e tutele la lenghe, la culture e la identitât dal Friûl. E je costituide tal rispiet des normis dal codiç civîl, dal decret legjislatîf n. 117/2017 e des altris normis in materie, cjapant la forme di associazion ricognossude, cence direzion partitiche ni ben politiche.

 

ART. 2 - Sede

La Societât Filologjiche Furlane e à la sô sede tal Palaç Mantica a Udin, in vie Manin n. 18. In Italie e tal forest a puedin jessi viertis sedis de Societât Filologjiche Furlane, che a dipendin dai orghins diretîfs de stesse.

ART. 3 - Ativitâts di interès gjenerâl

ART. 4 -  Ativitâts prevalentis
Lis ativitâts di interès gjenerâl a vegnin metudis in vore e prudeladis de Societât Filologjiche Furlane a pro dai siei associâts, dai lôr familiârs o di altris personis, fasint stât in mût prevalent su la ativitât di volontariât dai siei associâts o des personis iscritis ai ents associâts cu la mediazion de lenghe, de culture e de identitât dal Friûl - midiant:
1.    la tutele e la valorizazion de componente lenghistiche e culturâl furlane;
2.    il studi, la ricercje, la cognossince e la cussience dai problemis culturâi dal Friûl tal ambit de lenghe, de filologjie, de leteradure, dal insegnament, de formazion culturâl e professionâl, de storie, de art, de musiche e dal spetacul, des arts e des tradizions popolârs;
3.    il studi, la conservazion, il restaur e la valorizazion dai bens culturâi, mobii o imobii, materiâi o imateriâi, che a presentin interès lenghistic, architetonic, artistic, storic, archeologjic, etnografic, museâl, sientific, bibliografic e archivistic, ambientâl e dal paisaç, ancje par une lôr fruibilitât de bande dal public;
4.    la promozion de lenghe e de culture furlane tra lis comunitâts regjonâls imigradis di pôc, cun chê di semplificâ la inclusion e la partecipazion tal ambit de vite de comunitât;
5.    la valorizazion de lenghe, de culture e de identitât furlane tra i coregjonâi tal forest, cun chê di rinfuarçâ i leams cu la tiere di divignince;
6.    la promozion des lenghis e des culturis minoritariis.
Cun di plui la Societât Filologjiche Furlane, tant che centri di ricercje e di competencis su la lenghe e la culture furlane:
1.    e progjete, e programe e e cure cors e seminaris di formazion e inzornament culturâl e professionâl tal ambit de istruzion, de lenghe, de filologjie, de leteradure, de didatiche, de storie, des arts, des tradizions popolârs, dal ambient e dal teritori e in gjenerâl de culture furlane pal personâl, docent o no docent, des scuelis di cualsisei ordin o grât, pal personâl di ents e associazions e di ducj chei che a palesin interès par imparâ o aprofondî la cognossince de lenghe e de culture furlane;
2.    e progjete, e programe e e promôf il studi, la ricercje, la conservazion, il restaur e la valorizazion dai bens culturâi materiâi e imateriâi;
3.    e gjestìs, favorint la plui grande fruibilitât ae coletivitât, i siei bens culturâi imobii o mobii, ancje imateriâi e chei di altris sogjets furnint colaborazions o servizis ancje a ents e istituzions che a lavorin tal setôr;
4.    e promôf e e gjestìs, favorint la plui grande fruibilitât ae coletivitât, la sô biblioteche sociâl, biblioteche specialistiche di conservazion e valorizazion di materiâi su la lenghe e culture furlane e des altris minorancis lenghistichis regjonâls e nazionâls;
5.    e promôf, e colabore e e partecipe a progjets, iniziativis e ativitâts di ricercje sientifiche in colaborazion cun istituzions nazionâls e internazionâls;
6.    e publiche oparis periodichis, no periodichis e multimediâls, a caratar sientific, divulgatîf, popolâr e scuelastic;
7.    e destine borsis di studi, bants di concors, e promôf cunvignis, congrès, viaçs di studi e cors culturâi;
8.    e favorìs lis colaborazions cun ents, associazions o circui culturâi, prolocos, grups folcloristics, musicâi, corâi, teatrâi, filodramatics.

ART. 5 -  Ativitâts no prevalentis
Par conseguî lis finalitâts sociâls, segnadis tai articui chi parsore, la Societât Filologjiche Furlane e podarà puartâ indenant, in mût ni esclusîf ni prevalent, ancje ativitâts diferentis di chês previodudis dai articui 3 e 4 di chest Statût e tal câs diferentis di chês dal art. 5 dal decret legjislatîf n. 117/2017. A son pussibilis ancje ativitâts comerciâls che a concorin a la formazion dal patrimoni sociâl, se permetudis dal at costitutîf e di chest Statût e se a son secondariis e strumentâls rispiet a lis ativitâts di interès gjenerâl; chest daûr criteris e limits cumò definîts cun decret dal Ministri dal Lavôr e des Politichis Sociâls, in acuardi cul Ministri de Economie e des Financis, di fâ bogns daûr dal articul 17, come 3, de leç 23 di Avost dal 1988, n. 400, sintude la Cabine di regjie daûr dal articul 97, come ancje normis eventuâl, seguitivis, integrativis e modificativis, tignint cont dal complès des risorsis, ancje volontariis e gratuitis, impleadis tes ativitâts di interès gjenerâl.
Al è assolutamentri impruibît di dâ fûr tra socis, lavoradôrs e colaboradôrs, aministradôrs e altris components dai orghins sociâi ancje in câs di recès o di ogni altre ipotesi di conclusion individuâl dal rapuart associatîf, ancje in vie indirete, profits o rescj di gjestion, e ancje fonts, risiervis o capitâls cun cualsisei denominazion dilunc la vite de Associazion, fûr che la destinazion o distribuzion no sedin imponudis de leç.

Titul II: SOCIS

ART. 6 - Categoriis
La Societât Filologjiche si compon di:
1)    socis ordenaris;
2)    socis benemerits.
Cualsisei sogjet al pues assumi la cualifiche di soci cence nissune discriminazion par condizion economiche o di altre nature.
La adesion ae Filologjiche e je a timp indeterminât e no pues jessi fate par un timp determinât.
La cualifiche di soci ordenari si oten, daûr domande dal interessât, cul versament de cuote e la condivision des finalitâts sociâls, comprendût ancje l’impegn al rispiet dal Statût e dai regolaments e sucessive aprovazion dal President o di un Vicepresident. Un eventuâl dinei al varà di jessi mutivât par oblic.
La cuote di associazion e je fissade di an in an dal Ufici di Presidence.
A vegnin nomenâts benemerits dal Consei Diretîf e iscrits tal regjistri di pueste i socis che si son segnalâts par oparis di alte culture, o ben par une costante e lungje ativitât inte Associazion, par donazions o par un jutori straordenari a pro ce Societât Filologjiche Furlane.
La cualifiche di soci no da dirit a nissun privileç o limitazion nancje in vie indirete.
La cuote o ben il contribût associatîf nol è trasmissibil ni par mieç di un at tra vîfs ni mortis causa e nol pues jessi rivalutât.

ART. 7 - Dirits e dovês dai Socis
Ducj i socis:

• a àn il dirit di vôt te Assemblee e di jessi elets tai orghins sociâi a partî dal trentesim dì daspò dal perfezionament de iscrizion cul versament de prime cuote sociâl;

• a àn il dirit di jessi informâts su lis ativitâts de Associazion e di verificâ l’andament de stesse;

• a àn il dirit di cognossi l’ordin dal dì des assembleis, viodi il rindicont economic-finanziari, esaminâ i libris sociâi e consultâ i verbâi;

• a àn ancje il dirit di ricevi i periodics e di comprâ lis publicazions de Societât Filologjiche Furlane cun facilitazions particolârs e modalitâts stabilidis dal Ufici di Presidence.

Tal timp stes a àn il dovê di:

• rispietâ chest Statût;

• puartâ indenant la lôr ativitât sore nuie e cence fin di vuadagn ancje indiret;

• versâ la cuote associative te entitât stabilide.

 

ART. 8 - Pierdite de cualifiche di soci
La cualifiche di soci si piert par ritart tai paiaments, recès, esclusion o muart. Il ritart tai paiaments al ven verificât e declarât dal Ufici di Presidence daspò almancul une solecitazion al paiament des cuotis sociâls no paiadis; il soci al reste dut câs obleât al paiament de cuote pal an in cors e eventuâls altris cuotis no paiadis. Il soci al pues in cualsisei moment recedi de Societât Filologjiche Furlane. La declarazion di recès e à di jessi comunicade par iscrit al Ufici di Presidence e e à efiet cu la fin dal an in cors, baste ch’e sedi fate almancul trê mês prime de fin dal an. La esclusion dal soci e ven fate par mutîfs grâfs su propueste dal President o di un Vicepresident par deliberazion dal Ufici di Presidence. In ogni câs e je ametude la pussibilitât di ricors dentri di 30 dîs de comunicazion dal proviodiment ch’al verifiche il ritart tai paiaments, o ben la deliberazion ch’e dispon la esclusion, al Consei dai Probivîrs. Al è dut câs ametût il ricors sucessîf al judiç ordenari.

Titul III: ORGHINS SOCIÂI

ART. 9 - Orghins
A son orghins de Societât Filologjiche Furlane:

• la Assemblee Gjenerâl dai Socis;

• il Consei Gjenerâl; • l’Ufici di Presidence;

• il President;

• il Consei dai Revisôrs dai Conts;

• il Consei dai Probivîrs.

I orghins, che a puedin ducj jessi elets indaûr, a durin par trê esercizis e a scjadin cu la aprovazion dal belanç relatîf al tierç esercizi.

Par ducj i orghins e pues jessi previodude la partecipazion dai components midiant colegament a distance cun mieçs che a permetin la visualizazion e l’interazion dai partecipants in mût di garantî l’identificazion, il dirit di intervent e di vôt.

 

ART. 10 - Assemblee Gjenerâl dai socis
La Assemblee Gjenerâl dai Socis e je il plui alt orghin sovran deliberant de Societât Filologjiche Furlane. La Assemblee e je clamade adun dal President al mancul une volte ad an dentri dai prins trê mês par la aprovazion dal belanç cun avîs di mandâ ai socis cun cualsisei mieç idoni, ancje telematic, almancul cuindis dîs prime de date fissade. La Assemblee e je clamade adun dal President par sô iniziative, o su delibare dal Ufici di Presidence, o su domande scrite e motivade di almancul un decim dai socis e ancje dal Consei dai Revisôrs dai Conts par mutîfs fondâts. La convocazion e à di jessi fate dentri di un mês de delibare dal Ufici di Presidence o de notifiche de domande dai socis o di chê dal Consei dai Revisôrs.

Ae Assemblee a puedin partecipâ i Socis in regule cul versament de cuote associative. La Assemblee e je valide in prime convocazion se e je presinte la maiorance assolude dai socis e in seconde convocazion cun cualsisei numar dai Socis presints e e delibare, a maiorance dai presints, su cualsisei ogjet de delibare di meti in discussion.

La Assemblee in particolâr:

1. e fâs bon il belanç di esercizi, la relazion morâl e finanziarie, il belanç preventîf dal an cu ven;

2. e elei e e revoche i components dal Consei Gjenerâl, i components dal Ufici di Presidence, i components dal Consei dai Probivîrs;

3. e nomene i components dal Consei dai Revisôrs dai Conts;

4. e delibare su la responsabilitât dai components dai orghins sociâi e e promôf azions di responsabilitât tai lôr confronts;

5. e fâs buinis lis modifichis dal Statût e e delibare in merit al dissolviment, fusion, trasformazion o separazion de Associazion cu lis modalitâts indicadis tal articul 21;

6. e fâs bon l’eventuâl regolament dai lavôrs de Assemblee;

7. e delibare su altris ogjets atribuîts de leç, dal Statût ae sô competence.

Te Assemblee ogni soci al à un vôt e al pues delegâ un altri soci a votâ par so cont, baste che il delegât al partecipi in presince fisiche. A son ametudis dôs deleghis scritis par ogni soci. Chest Statût al pues jessi modificât de Assemblee baste che la propueste e sedi includude tal ordin dal dì de convocazion. Lis propuestis di modifiche dal Statût a puedin jessi domandadis di almancul cincuante socis o metudis dentri dal ordin dal dì de Assemblee. Lis modifichis dal Statût a àn di jessi deliberadis a maiorance assolude dai socis presints in Assemblee. In ogni câs la Associazion si conformarà a ogni norme legjislative o regolamentâr ancje di future jentrade in vigôr, sedi statâl o locâl, in materie di Ents dal Tierç Setôr. I verbâi des delibaris de Assemblee a vegnin conservâts in libris di pueste e publicâts sul sît internet de Societât Filologjiche Furlane.

 

ART. 11 - Consei Gjenerâl
Il Consei Gjenerâl al è l’orghin consultîf principâl de Societât Filologjiche Furlane, al è metût dongje di un minim di cuarante a un massim di setante components e al ven clamât dongje almancul dôs voltis ad an dal President; la sô convocazion e pues jessi ancje domandade di un tierç dai conseîrs daûr di une domande par scrit e justificade. Il Consei Gjenerâl al è regolarmentri costituît in prime convocazion cuant ch’e je presinte la maiorance assolude dai components e in seconde convocazion cun cualsisei numar dai components. No son ametudis deleghis.

Il Consei Gjenerâl al à il compit di proponi al Ufici di Presidence lis iniziativis e lis ativitâts de Societât Filologjiche Furlane, al promôf la formazion di comissions particolârs di studi par tratâ cuistions specifichis cun atenzion ai fins sociâi o dut câs buinis pe soluzion dai stes, al nomene i Socis benemerits. Il President de Societât Filologjiche Furlane o un so delegât, baste ch’al sedi component dal Consei stes o dal Ufici di Presidence, al è a cjâf dal Consei Gjenerâl.

I components dal Ufici di Presidence a puedin cjapâ part a lis riunions dal Consei Gjenerâl cun dirit di peraule, ma cence dirit di vôt.

 

ART. 12 - Ufici di Presidence
L’Ufici di Presidence si compon di un numar variabil di siet a undis components elets de Assemblee dai socis. Te prime riunion di fâ dentri di dîs dîs dopo de elezion, l’Ufici di Presidence al nomene, sielzint tra i siei components:

• Il President de Societât Filologjiche Furlane;

• il Vicepresident pe Cjargne; • il Vicepresident pal Friûl di mieç;

• il Vicepresident pal Friûl di soreli a mont;

• il Vicepresident pal Friûl di soreli jevât;

• il Tesorîr;

• il Segretari.

In rispiet des regjons storichis dal Friûl e lassant in bande lis divisions politichis-aministrativis, tignint cont di ogni plui grant margjin di operativitât e rapresentance ancje par chei teritoris là che si cjate une componente storiche e lenghistiche furlane, i cuatri Vicepresidents a rapresentin:

• la Cjargne, mari dal Friûl, cun Sapade, il Cjanâl dal Fier, il Cjanâl de Fele e il Friûl de Alte;

• il Friûl di mieç, ch’al corispuint al teritori storic de Provincie di Udin no di competence di altris Vicepresidencis;

• il Friûl di soreli a mont, ch’al corispuint al teritori storic de Provincie di Pordenon, di Puart e dai teritoris tacâts;

• il Friûl di soreli jevât, ch’al corispuint al teritori storic de Provincie di Gurize e dai teritoris tacâts.

L’Ufici di Presidence al è l’orghin di gjestion de Societât Filologjiche Furlane, al cure i interès de stesse, al proviôt a pensâ, promovi, coordenâ lis ativitâts de Societât Filologjiche Furlane, al da ai socis incarghis particolârs pes publicazions, pai diferents setôrs di ativitât, pai rapuarts cun sodalizis e su dutis lis cuistions che a rivuardin la vite de Societât Filologjiche Furlane.

L’Ufici di Presidence:

1. si da dongje su convocazion dal President o su domande de maiorance dai siei components. Pe validitât des riunions e je necessarie la presince de maiorance dai components;

2. in câs di dimissions o decjadence anticipade dai singui components dal Ufici di Presidence, te prime Assemblee util, e dut câs dentri di 12 mês, si sostituirà il component dimissionari o decjadût, ch’al restarà in cjarie fin a la sucessive rinovazion dal Ufici di Presidence;

3. ogni component al à dirit a un vôt; in câs di paritât al prevâl il vôt dal President; nol è ametût il vôt par deleghe.

L’Ufici di Presidence, in particolâr:

a. al adote la relazion morâl preparade dal President e al predispon il rindicont economic e finanziari e il belanç di prevision;

b. al stabilìs la date e l’ordin dal dì de Assemblee;

c. al delibare eventuâi proviodiments di esclusion dai socis.

L’Ufici di Presidence al pues conferî incarghis determinadis e particolârs a un o plui conseîrs o Vicepresidents, istituî Comissions particolârs e i lôr podês, definî lis funzions dal Tesorîr e in câs nomenâ, tal rispiet de disponibilitât finanziarie, un Diretôr ch’al pues jessi delegât di dutis o di une part des funzions aministrativis e di gjestion propris dal Ufici di Presidence.

Il Diretôr al agjìs tai limits dal mandât ricevût, che i pues jessi gjavât vie in cualsisei moment, daûr des normis in vore. I components dal Ufici di Presidence, tant che aministradôrs, dentri di trente dîs de notizie de lôr nomine, a àn di domandâ la iscrizion intal regjistri unic nazionâl dal Tierç Setôr, segnânt il non, il cognon, il lûc e la date di nassite, il domicili, la citadinance e il podê di rapresentance che a son titolârs in câs di impediment dal President.

Il podê di rapresentance al è gjenerâl e lis eventuâls limitazions no si puedin oponi a tierçs in mancjance di iscrizion o se no si prove che il tierç al jere vignût a cognossince. I components dal Ufici di Presidence, tant che aministradôrs, a rispuindin tai confronts dal Ent, dai creditôrs sociâi, des associâts e di tierçs daûr de normative in vore.

 

ART. 13 - Il President
Il President de Societât Filologjiche Furlane al rapresente par leç la Societât ancje in judizi cun facoltât di promovi azions e istancis judiziariis e aministrativis par ogni grât di jurisdizion e ancje par judizi di cassazion e revoche, nomenant a la bisugne avocats e procuradôrs ad lites. In câs di assence o impediment dal President, la Societât Filologjiche Furlane e ven rapresentade dal Vicepresident pal Friûl di mieç, se no di un altri Vicepresident o conseîr component dal Ufici di Presidence delegât dal President. Ai Vicepresidents, in plui, e je diretamentri lassade la organizazion e la gjestion dai teritoris e des delegazions eventualmentri istituidis intai lûcs di competence, simpri in colaborazion cul Ufici di Presidence.

ART. 14 - Orghin di control

L’orghin di control, clamât Coleç dai Revisôrs dai Conts, al è costituît di trê components efetîfs e di doi suplents, nomenâts de Assemblee Gjenerâl ancje tra i no socis. Il President al Coleç al à di jessi iscrit inte Liste dai revisôrs legâi. Il Coleç al sta atent ae osservance de leç e dal Statût e al rispiet dai principis di buine aministrazion e ancje ae justece de organizazion e contabilitât e sul so reâl funzionament. Tal câs di superament dai limits previodûts de leç, al è invistût ancje de revision legâl dai conts. Ta chest ultin câs, se ducj i components in cjarie no àn i recuisîts previodûts, la funzion di revision legâl e sarà dome dal President in funzion monocratiche. Il President dal Coleç dai Revisôrs dai Conts al pues domandâ, par juscj mutîfs, la convocazion de Assemblee.

 

ART. 15 - Coleç dai Probivîrs IlIl Coleç dai Probivîrs al è metût dongje di cinc components, elets tra i Socis de Assemblee Gjenerâl. Daûr de domande dal interessât, il Coleç al delibare cence apelabilitât la esclusion dal soci decidude dal Ufici di Presidence. Al pant la sô opinion sul ricors di almancul un decim dai Socis, su eventuâls violazions dal Statût de bande dai orghins diretîfs. Il component plui vieli al è a cjâf e al convoche il Coleç. Il component plui zovin al fâs di Segretari e al scrîf i verbâi des sentadis.

Titul IV: SEDIS LOCÂLS

ART. 16 - Istituzion sedis locâls
Si puedin istituî, cun deliberazion dal Ufici de Presidence, sedis locâls de Societât Filologjiche Furlane. A son gjestidis in plene autonomie dal Vicepresident competent sul teritori, ch’al à ancje la facoltât di delegâ dal dut o in part la gjestion. Aes sedis locâls si assegne ogni an une dotazion finanziarie ch’e ven gjestide in plene autonomie, dut câs cul oblic di rindicontazion periodiche, te unitarietât dal belanç cu la sede centrâl. Ogni lassit, contribût, finanziament o introit di cualsisei gjenar o nature otignût a cualsisei titul di une sede locâl al ven gjestît dome de midiesime, cence pussibilitât di ûs pes ativitâts localizadis di altris bandis, dut câs inte unitarietât di belanç e cul oblic di rindicontazion periodiche. Su iniziative di ogni sede locâl si puedin istituî delegazions rezudis e gjestidis in mût diret de sede locâl e a complet caric de midiesime.

Titul V: PATRIMONI

Art. 17 - Patrimoni
Il patrimoni de Societât Filologjiche Furlane si compon di:

• bens mobii e imobii che a rivin ae Associazion a cualsisei titul;

• erogazions, contribûts, donazions o il lassit par cont di Ents publics e privâts o di personis fisichis;

• rescj nets di gjestion.

Lis jentradis de Associazion a son costituidis di:

• lis cuotis associativis e i eventuâi contribûts volontaris;

• il rigjâf de organizazion des manifestazions, iniziativis o ativitâts promovudis de Associazion;

• di ogni altre jentrade realizade tal davuelziment de ativitât dal Ent.

Il patrimoni de Societât Filologjiche Furlane, comprendût di eventuâls renditis, rigjâfs, vuadagns, jentradis in ogni câs clamadis, si doprilu pal davuelziment de ativitât dal Statût.

 

ART. 18  - Esercizi finanziari
L’esercizi finanziari al coincît cul an solâr.
L’esercizi finanziari al coincît cul an solâr. Il belanç dal esercizi de Societât Filologjiche Furlane al è unic e unitari e al è formât dal stât patrimoniâl, dal rindicont di gjestion, cun indicazion des spesis e des jentradis dal Ent e de relazion di mission ch’e mostre lis puestis dal belanç, la evoluzion economiche e di gjestion dal Ent e des modalitâts par realizâ lis finalitâts dal Statût. Al è scrit in conformitât ae modulistiche definide cun decret dal Ministri dal lavôr e des politichis sociâls, daspò di vê sintût il Consei nazionâl dal Tierç Setôr. I belançs a àn di restâ depositâts inte sede de Associazion tai cuindis dîs precedents la Assemblee convocade par la lôr aprovazion, a disposizion di ducj chei che a àn mutivât interès ae lôr leture.

ART. 19 - Libris Sociâi
La Societât Filologjiche Furlane e ten:

• il libri dai associâts, par cure dal Ufici di Presidence;

• il libri des adunancis e des deliberazions des Assembleis, indulà che a àn di jessi trascrits ancje i verbâi prontâts par at public, par cure dal Ufici di Presidence;

• il libri des adunancis e des deliberazions dal Ufici di Presidence, dal Consei Gjenerâl e dal Consei dai Revisôrs dai Conts, par cure dai rispetîfs orghins. I socis a àn il dirit di esaminâ i libris sociâi tes modalitâts definidis dal specific regolament associatîf.

 

ART. 20 - Gjestion de societât

Il funzionament interni de Societât Filologjiche Furlane al pues jessi dissiplinât di specifics regolaments, di emanâ, fûr che ce ch’al è di competence de Assemblee, par cure dal Ufici di Presidence, ch’al proviodarà a tignî eventuâi regjistris previodûts de normative in vore o dut câs considerâts oportuns, ancje in considerazion di ce ch’al è previodût dai articui 17, 18 e 36 dal decret legjislatîf n. 117/2017.

ART. 21 - Dissolviment e destinazions dai bens

Il dissolviment de Associazion al è deliberât de Assemblee cu la maiorance (art. 10 di chest Statût), ch’e proviodarà ae nomine di un o plui licuidadôrs. In câs di cessazion o dissolviment de Associazion, il patrimoni ch’al vanze al è destinât, daspò parê positîf di eventuâi orghins o autoritâts designadis de normative in vore, e gjavant il câs che la leç e imponi une destinazion divierse, a altris Ents dal Tierç Setôr cun finalitâts parelis o fins di publiche utilitât.

 

Art. 22 – Riferiment

Par dut ce che nol è espressamentri previodût ta chest Statût e tai Regolaments internis, si fâs riferiment a lis normis dal codiç civîl e a lis normativis in vore par ce ch’al inten il Tierç Setôr.

 

Art. 23 – Norme transitorie

L’acronim ETS al podarà jessi inserît te denominazion in vie automatiche e al podarà jessi doprât tai rapuarts cui tierçs, tai ats, te corispondence e tes comunicazions cul public nome dopo di vê otignût l’iscrizion tal Regjistri Unic Nazionâl dal Tierç Setôr.