La Associazion Teatrâl Furlane e lavore di plui di cuarante agns cun chê di valorizâ il teatri furlan, la culture e la lenghe.
Cu la 14te edizion dal concors, la ATF e vûl stiçâ ducj i apassionâts a scrivi pal teatri furlan e a proponi une proprie storie origjinâl pe sene.
Si vûl ancje favorî cui che al à une biele idee ma nol rive a componi un copion intîr, o pûr al à pôre di frontâ la scriture in marilenghe. Simpri sul gjenar "comedie" si pues mandâ ancje un "monolic" o un "test curt", in mût di podê misurâsi ancje cu la costruzion di tescj curts.
Par di plui chest an, in ocasion dal 50m aniversari dal taramot si propon ancje une racuelte di contis par "No Smenteâ": contis curtis ancje di fantasie che a fasin riferiment ae esperience dal taramot sedi vivût di dentri che di tant lontan, al impat che al à vût, ai ricuarts e aes sperancis che al à lassât.
Simpri cuntun voli ae formazion, a son stâts organizâts doi cors a gratis tignûts de associazion Servi di Scena-Matearium: tal mês di Mai un prin cors "Peraulis in sene" sul svicinament ae sene partint di un copion o di une canevace teatrâl e il cors di scriture creative “Scrîf! Scrîf! Scrîf!” che si fasarà in linie in Setembar.
Sul sît internet associazioneteatralefriulana.com si pues iscrivisi a une o plui iniziativis. Dopo de edizion passade (a jerin rivâts 23 copions e cuatri a son bielzà lâts in sene), si spietisi il rivâ di tantis comediis brilantis a teme libar, monolics o curts teatrâi gustôs. Pes contis "No Smenteâ", invezit, si previôt la publicazion di une racuelte specifiche par leturis senichis a ricuart e celebrazion dal aniversari.
O spietìn i tescj di ducj i furlans, ancje dal forest!