Contis sot spirt par radio!
De fantasie ferbinte di Raffaele Serafini e nas la racuelte Contis sot spirt, che e à vinçût il Premi San Simon dal Comun di Codroip tal 2017 e che e cjape dentri 10 contis li che a tornin a vivi lis oparis e lis azions di dîs personaçs ricuardâts in dì di vuê plui che altri tant che nons di scuelis superiôrs di Udin: Giacomo Ceconi, Jacopo Linussio, Giovanni Marinelli, Bonaldo Stringher, Cecilia Deganutti, Giovanni Sello, Antonio Zanon, Caterina Percoto, Giovanni Giacomo Marinoni, Jacopo Stellini.
Pontade dopo pontade, il polvar de dismentee che si è poiât parsore de memorie di chestis figuris si alce sù e al lasse intivâ vitis straordenariis, romanzadis intun stîl naratîf origjinâl e a dadis visionari. Ae fin di ogni conte, une schede informative e met in struc la biografie di ogni protagonist, cui estrems cronologjics, avigniments insolits e curiositâts.
L’adatament radiofonic des storiis, par cure di Serena Fogolini, al ven interpretât de vôs di Massimo Somaglino e des musichis di Vittorio Vella. La trasmission e va in onde dutis lis sabidis par Radio Rai FVG, a lis dôs mancul vincj e si pues tornâ a scoltâ su Raiplay Sound te sezion dedicade a “Contis sot spirt” dal podcast “Conte che ti conti”.