Dut pront pe decime edizion de Scuele di Avost, la Summer school indreçade ai docents di ducj i grâts e di dut il Friûl, inmaneade de Societât Filologjiche Furlane midiant dal Docuscuele - Centri regjonâl di documentazion ricercje e sperimentazion didatiche pe scuele furlane, cul contribût de Regjon, il patrocini di ARLeF - Agjenzie Regjonâl pe Lenghe Furlane, Universitât dal Friûl e Ufici Scolastic Regjonâl e in colaborazion cul CESFAM di Paluce (Centri servizis pai boscs e pes ativitâts de mont), li che si fasaran dutis lis ativitâts.
Il program al tacarà lunis ai 24 di Avost, a 10.00 di buinore, cui salûts des autoritâts e la presentazion dal diari scolastic Olmis 2026/27, che di passe trente agns la Societât Filologjiche Furlane e da fûr sore nuie a plui di 15.000 students de scuele primarie di dut il teritori furlanofon. A contâ il teme di chest an a saran Letizia Diamante, divulgadore sientifiche e autore dai tescj, e Elena Veronesi, ilustradore, che a menaran i partecipants dentri dal mont de sience des stagjons. Vie pe buinore a vignaran presentadis ancje lis gnovis publicazions Architeture par furlan. Schedis didatichis par imparâ a cjalâ lis oparis architetonichis dal Friûl, par cure dal grup dai docents di CollinRete, e Il regâl di Biatriç, il volum ilustrât di Barbara Jelenkovich e scrit di Giovanna Zordan sul cjistiel di Gurize, voltât in cinc lenghis (furlan, inglês, talian, sloven e todesc). Tal dopomisdì si fasaran i laboratoris didatics: A teatri cun Biatriç, cun Barbara Jelenkovich, su la tecniche dal kamishibai; Storiis platadis, cun Elena Veronesi, su la creazion di un libri di storiis a tacâ di piçui detais; e Fûr de classe, dentri dal teritori, cul docent universitari Andrea Guaran e Giulia Masarotti, su la educazion tal viert. A 9 di sere al vignarà proietât il documentari Barbara Jelenkovich: viaggio nel Friuli illustrato, produsût de Filologjiche, cu la regjie di Maurizio Callegaro.
La buinore di martars ai 25 di Avost e sarà dedicade ae visite di malghe Promôs, in compagnie di Andrea Pincin, responsabil dal CESFAM. Tal dopomisdì, i partecipants a podaran partecipâ ai seminaris A teatri cun Biatriç, Storiis platadis e Dal dî al fâ, un seminari esperienziâl di archeologjie cun Martina Zamero. A 9 di sere e larà in sene la leture in musiche Fiore di roccia, gjavade fûr dal romanç di Ilaria Tuti su lis puartadoris cjargnelis.
Miercus ai 26 di Avost, a 10 di buinore al sarà presentât il fumet Silvie e l’orcul. Une storie di fantasie dal taramot in Friûl, di Gio Di Qual e Gio De Luca, vincidôr dal premi San Simon. Po dopo, cerviei pronts par sperimentâ il zûc linguistic e educatîf Po dopo, creât dal stiçadôr di ideis Alessandro Di Pauli. Par sierâ la buinore, Ada Bier e presentarà i risultâts de prime edizion di Scrivi a Scuele, il cors di formazion dal Docuscuele organizât dentri di diviers istitûts comprensîfs furlans. A 3 dopomisdì e je in program une visite al Museu de Grande Vuere a Tamau.
Pe ocasion, si pues notâsi pai pascj e par fermâsi a durmî a Paluce inte forestarie dal CESFAM.
Lis informazions a son tal program che si pues discjamâ in cheste pagjine.