Lis ativitâts pe scuele furlane a son simpri stadis al centri dai programs de Societât Filologjiche Furlane: dai tancj struments pe scuele publicâts fin de fondazion ai cors di formazion inviâts tal secont dopovuere su la fonde di une buine intuizion di don Giuseppe Marchetti.
L’aprendiment dal furlan, in fat, al è segnâl impuartant de apartignince a une storie e a une culture che, cui nestris zovins, e podarà vê un grant avignî.
In cheste prospetive, la Societât Filologjiche e organize
cors di formazion par insegnants, e promôf
progjets didatics, e realize il
diari scuelastic Olmis, e publiche il
boletin Scuele furlane, e bandìs concors dedicâts al mont de scuele (tra ducj, il
Premi Chino Ermacora scuele e marilenghe par progjets didatics sul Friûl), e prodûs struments pal aprendiment de lenghe furlane dedicâts ai plui piçui.
Di impuartance strategjiche fondamentâl pal mont de scuele regjonâl al è
Docuscuele, il
Centri di documentazion, ricercje e sperimentazion par la scuele furlane inmaneât e gjestît de Societât Filologjiche Furlane.
Lis ativitâts dal centri a son:
- racuelte di materiâi, progjets, publicazions su la didatiche in/di lenghe furlane;
- ativitâts didatichis tes scuelis, percors di inzornament pai insegnants;
- incuintris e distribuzion di materiâi pai insegnants, arlêfs e fameis;
- gjestion di une plateforme in linie pe documentazion didatiche.
La Societât e je ancje impegnade in progjets di cooperazion internazionâl pe valorizazion des diversitâts linguistichis e dal insegnament plurillengâl.