Il mestri Lucio Peressi i à regalât ae Societât Filologjiche la sô documentazion su la storie de scuele furlane. Ta cheste racuelte, che e je stade clamade
Archivi Peressi, si puedin cjatâ une vore di materiâi di interès scuelastic, che no rivuardin dome la regjon furlane, ma ancje lis rêts europeanis di tutele e di promozion scuelastiche. Cun di plui, tal archivi e je ancje une documentazion une vore interessante sul iter burocratic e legjislatîf di aprovazion des leçs di tutele.
Il materiâl dal archivi al cjape dentri in particolâr:
- documents uficiâi, racomandazions di istituzions, ricercjis, cunvignis, comparazions e studis;
- tentatîfs di inscuelament, realizazion di cors di formazion e di inzornament par insegnants;
- propuestis di leç;
- articui, publicâts massime su gjornâi e setemanâi, su esperiencis, cunvignis, dibatits su la oportunitât di inserî l’insegnament dal furlan te ativitât scuelastiche.
La documentazion e va dai agns Sessante ai agns Novante. L'
Archivi lu à catalogât Lia Iacuzzo pe sô tesi di lauree (
Il "Fondo Peressi" presso la Biblioteca della Società Filologica Friulana, a.a. 2011-2012).