A son tantis li oparis di Pieri Pauli Pasolini chea àn un rapuart diret cul Friûl parcè che a son stadis scritis, publicadis o stampadis in Friûl, o ben oparis in lenghe furlane, o pûr che a contegnin nons di lûc, di feminis, di oms dal Friûl. Cetancj autôrs in dut il mont a àn scandaiât chestis relazions e a ’nd àn scrit monografiis, articui, saçs e recensions. Dut câs nol è simpri facil cjatâ fûr chescj materiâi e duncje dâ rispuestis a cui che al vûl capî miôr chel leam fuart jenfri Pasolini e il Friûl, il furlan e i furlans.
Bibliografia friulana di Pasolini al è il titul dal progjet, condividût dal Centro Studis Pasolini di Cjasarse e de Societât Filologjiche Furlane, che al à permetût di realizâ un sît internet cuntun data base simpri in inzornament, che al conten schedis bibliografichis une vore aprofondidis e lis relazions che a conventin par identificâ cun precision lis fonts: cussì par esempli si pues savê cuant e dulà che Pasolini al à doprât i pseudonims Pieri Fumul o San Pieri, o ben cualis che a son stadis lis primis recensions di Poesie a Casarsa, dulà che a son stadis publicadis la prime volte e cualis che a son lis edizions sucessivis, tropis copiis che a son stadis stampadis e se cualchi biblioteche e conserve des copiis cun dediche autografe dal autôr.
Il sît, che si pues consultâ ae direzion www.pasolinibibliografiafriulana.it, al è stât presentât ai 14 di Lui dal 2022, tal an dal centenari de nassite di Pasolini e in une date che e à un significât precîs: propit ai 14 di Lui dal 1942, di fat, la “Anonima Arti Grafiche” di Bologne e finive di stampâ pe “Libreria Antiquaria” di Mario Landi la racuelte des Poesie a Casarsa.