Il Strolic Furlan de Societât Filologjiche Furlane al va daûr de lungje tradizion dal Votcent dal strolegâ, cul so rapresentant plui innomenât, Pietro Zorutti.
La storie centenarie dal Strolic Furlan e je la stesse de Societât Filologjiche.
A la conclusion de Assemblee Costitutive de Societât, ai 23 di Novembar dal 1919, il prin Consei Diretîf al decît di fat di inviâ daurman la publicazion dal gnûf lunari.
Lis pagjinis dal Strolic a àn dât acet ai nons plui sflandorôs de leterature furlane, ancje ore presint. In cent anadis si contin plui di 9.000 contribûts par 18.000 pagjinis scritis. Lis contis, lis poesiis, lis vilotis, lis parts gustosis e lis barzaletis nus presentin un afresc de vite furlane dai prins dal Nûfcent fin in dì di vuê.
Dutis lis nestris feveladis a cjatin puest: il Strolic al da vôs a lis tantis varietâts lenghistichis locâls, par mantignî salt il sens di apartignince a la comunitât furlane.
La Societât Filologjiche Furlane e à digjitalizât chest patrimoni, che si pues consultâ in rêt fracant ca parsore.