La sede de Societât Filologjiche Furlane pal Friûl di soreli jevât e je
Cjasa Ascoli.
Si cjatile al civic 1 di vie Ascoli, te jentrade dal Ghet ebraic di Guriza, istituît tal 1696 cuntun edit dal Imperadôr Leopolt I.
Chest edifici al à une grande impuartance pe Societât Filologjiche par vie che culì al nassè il glotolic gurizan
Graziadio Isaia Ascoli (1829-1907), che il Sodalizi i è intitulât.
Dopo il so trasferiment a Milan, tal 1868 Ascoli al vendè la cjase di so pari al marchês Gherardo Molza che, tal 1871, le lassà a Josip Tronkli, avocat e politic sloven che al veve il studi a Guriza.
Tal 1907, il stes an di Ascoli, al murì ancje Tronkli; la vedue Olga Zoppetti i ufrì l’edifici al Comun, ma il Podestât Marani lu refudà par vie che il presi al jere plui alt de disponibilitât. Cussì l’imobil al passà in man di diviers proprietaris fin che il Comun di Guriza lu comprà tal 1978.
A diference des cjasis dai ghets ebraics, che par solit si svilupavin massime in altece par vie dal pôc puest dulà podê fâ sù, Cjasa Ascoli e à doi plans cun façadis che l’avocat Tronkli, dopo che le veve comprade, al fasè tornâ a fâ dal dut in stîl neoclassic.
La façade principâl, là che al colpìs il puarton d’ingrès insuazât in piere, e fo rivistide cun stabilidure sagomade di bugnâts di grant spessôr. Al prin plan, invezit, si viodin grancj barcons decorâts cun templârs. Inte part centrâl de stesse façade e je la lapide che e ricuarde il grant glotolic Ascoli, scuvierte in ocasion de tierce Cunvigne anuâl de Societât Filologjiche Furlane il prin di Otubar dal 1922.
Cul restaur fat fâ di Tronkli, ancje tai ambients dal prin plan si faserin diviers cambiaments e te jentrade si metè la grande stue di maioliche, che si pues viodile ancjemò vuê rivant sù al prin plan.
Dopo che le à comprade il Comun, tai agns Otante Cjasa Ascoli e je stade ristruturade cu la sostituzion des partizions orizontâls e diviersis modifichis internis, deventant tal 1991 e fin al 2016 sede uficiâl de Sorintendence di Guriza. In chescj agns a son stâts restaurâts ancje i cassetons in cjarte pestade intes salis dal prin plan.
Fracant achì si puedin lei e discjamâ in maniere libare in formât pdf tancj contribûts gjavât des rivistis de Societât Filologjiche su la figure e la opare di Graziadio Isaia Ascoli.