Cui che o sin

La Societât Filologjiche Furlane e je un ent morâl, une associazion ricognossude e l’istitût culturâl primari dal Friûl. La sô sede e je a Udin, tal innomenât Palaç Mantica.
Lis finalitâts de Societât, come che si palese tal cuart articul dal so statût, a son «la tutele e la valorizazion de componente lenghistiche e culturâl furlane; il studi, la ricercje, la cognossince e la cussience dai problemis culturâi dal Friûl tal ambit de lenghe, de filologjie, de leteradure, dal insegnament, de formazion culturâl e professionâl, de storie, de art, de musiche e dal spetacul, des arts e des tradizions popolârs; il studi, la conservazion, il restaur e la valorizazion dai bens culturâi, mobii o imobii, materiâi o imateriâi, che a presentin interès lenghistic, architetonic, artistic, storic, archeologjic, etnografic, museâl, sientific, bibliografic e archivistic, ambientâl e dal paisaç, ancje par une lôr fruibilitât de bande dal public; la promozion de lenghe e de culture furlane tra lis comunitâts regjonâls imigradis di pôc, cun chê di semplificâ la inclusion e la partecipazion tal ambit de vite de comunitât; la valorizazion de lenghe, de culture e de identitât furlane tra i coregjonâi tal forest, cun chê di rinfuarçâ i leams cu la tiere di divignince;
la promozion des lenghis e des culturis minoritariis».
La Societât e à une rêt di contats profitevui cun associazions, ents publics e privâts, istituzions universitariis talianis e forestis e cu lis organizazions di altris minorancis lenghistichis.