La Societât Filologjiche Furlane e à metût in pîts il Dizionari dai Gurizans, cun chê di valorizâ la pluralitât culturâl, linguistiche e storiche dal teritori gurizan midiant di imprescj educatîfs acessibii, sperimentâts e cun fondis sientifichis.
La iniziative si disvilupe te suaze de didatiche de storie locâl, cun chê di promovi la cognossince dal patrimoni dal gurizan intes zovinis gjenerazions, stiçant procès di identificazion cussiente e di citadinance ative.
Lis biografiis cjapadis dentri inte opare, dedicadis a figuris rapresentativis de aree gurizane tra Votcent e Nûfcent, a cuvierzin une biele schirie di setôrs dal savê e dal fâ uman, de leterature ae linguistiche, aes siencis, ae medisine, al ativisim sociâl, e a son spieli de complessitât multiculturâl dal teritori, caraterizât di une convivence storiche di comunitâts talianis, slovenis, furlanis, ebraichis e gjermanofonis.
Lis schedis biografichis, scritis in forme di struc ma documentadis, a son insioradis di fotografiis e dai riferiments bibliografics dal câs. A completâ la schede, cun di plui, si cjate une zonte di ûs didatic par docents e students de Scuele secondarie di prin e di secont grât, cun ideis par lâ insot – ancje in maniere interdissiplinâr – e cun percors integrâts di Educazion civiche.
Il Dizionari dai Gurizans si pues consultâlu sedi in formât digjitâl open access intal portâl dal Centri regjonâl di documentazion, ricercje e sperimentazion didatiche pe scuele furlane (Docuscuele), sedi su cjarte.
La iniziative e jentre inte suaze dal progjet “GO! Educare all’identità” cu la poie de:
Fondazione Cassa di Risparmio di Gorizia
