Domenie ai 3 di Març dal 2024 i socis de Filologjiche Furlane si son dâts dongje te sede di Palaç Mantica a Udin pe Assemblee gjenerâl ordenarie.
Un moment impuartant par fâ un belanç, no dome economic, de ativitât dal sodalizi e une ocasion par mostrâ ai socis e a la comunitât furlane lis iniziativis che la Filologjiche e à puartât indevant tal 2023 e chês in program pal 2024. Dal an passât in assemblee si presente ancje il belanç sociâl, un imprest fondamentâl pe rendicontazion no dome finanziarie, ma ancje par podê fâ une valutazion dal “impat sociâl” dal Sodalizi pe comunitât e pal teritori furlan.
Inte relazion morâl il president Federico Vicario al è metût in lûs la incressite costant des ativitâts, une incressite che e rint la Societât Filologjiche un pont di riferiment simpri plui fuart e centrâl par tignî adun il mont de culture furlane. Une ativitât che e cres an par an tal numar di manifestazions, cors pratics di lenghe e culture furlane e di formazion pai insegnants (che a son simpri plui domandâts sedi in presince sedi in linie), produzion editoriâl, ativitât de biblioteche cun percors bibliografics gnûfs, donazions di materiâi, digjitalizazion di fonts di fotografiis, articui, volums. Une ufierte une vore preseade di bande dai furlans che a partecipin ai events, a jentrin tal sît internet (o sin rivâts intun an a 189 mil acès par 130 mil utents), si iscrivin al servizi di newsletter (che al cjape dentri 4.960 contats), a consultin i catalics in linie (45 mil consultazions tal 2023).
Al è stât presentât che nol è tant, in colaborazion cu la Biblioteche civiche Joppi e cu la Universitât dal Friûl, il gnûf sît www.techefriulane.it, che al permet di consultâ in maniere une vore facile ducj i contignûts che a son stâts digjitalizâts e cjamâts in rêt tai ultins agns: fonts fotografics, materiâi multimediâi, volums che a rivuardin cetancj aspiets de culture furlane, manifescj storics.
«Cheste proiezion virtuâl de comunicazion culturâl – al à metût in lûs Vicario – e je il prodot di une programazion lungje e impegnative che si è disvilupade tai agns, ancjemò prime dal Covid, e che e met adun une largje schirie di associazions». Il metisi adun par fâ rêt e je ancje la regule de Setemane de culture furlane, la rassegne di events che si fâs tal mês di Mai e che tal 2023 e je rivade a 200 manifestazions.
Tra lis ativitâts realizadis tal 2023 o ricuardìn ancje in particolâr la publicazion e la mostre sul artist Carlo da Carona e sui scultôrs lombarts dal Rinassiment in Friûl e la animazion dal fumet Ti conti il Vaiont, realizât tai 60 agns dal plui grant disastri ambientâl dal Nûfcent par prudelâ la memorie tes gjenerazions plui zovinis. La Filologjiche e je di fat une vore impegnade pal mont de scuele, in gracie des ativitâts dal Docuscuele, il Centri di Documentazion Ricercje e Sperimentazion Didatiche pe Scuele Furlane Docuscuele, che al promôf cors di formazion pai docents, publicazions didatichis, moments di informazion e assistence ai insegnants.
O ricuardìn ancje il progjet european “Primis Plus” par promovi il Friûl, dal pont di viste turistic, a traviers de lenghe, de culture e de identitât furlane e la adesion al FUEN, la Federazion unitarie des minorancis europeanis. Cun di plui la Filologjiche e je stade ricognossude di bande de Regjon tant che Centri di divulgazion de culture umanistiche.
In assemblee a son stâts presentâts ancje i apontaments pal 2024: dai 9 ai 19 di Mai la Setemane de Culture Furlane che che si sierarà cu la Fraie de Vierte a Fors Davôtri e, in Otubar, il Congrès sociâl a Concuardie. In Novembar si ricuardaran cuntune cunvigne i cent agns dal progjet dal ALI – Atlant Lenghistic Talian, in colaborazion cu la Universitât di Turin. Chestis iniziativis a pandin la atenzion de Societât no dome pe lenghe furlane, ma ancje par dutis lis lenghis dal Alt Adriatic, inte prospetive dal lenghist Graziadio Isaia Ascoli, che la Filologjiche i è intitulade.
Par finî, in curt - ai 14 di Març- si fasarà un incuintri su la cuistion dal furlan inte programazion radiotelevisive de RAI in ocasion dal gnûf contrat dal servizi public, in colaborazion cu la ACLIF - Assemblee de Comunitât Lenghistiche Furlane.