Ai 14 di Lui al è stât presentât, inte sede dal Centri Studis Pasolini di Cjase Colussi Pasolini a Cjasarse, il sît internet Pasolini Bibliografia Friulana, un gnûf imprest par cognossi lis oparis di Pieri Pauli Pasolini che a àn un rapuart diret cul Friûl: oparis scritis, publicadis o stampadis in Friûl, o ben oparis in lenghe furlane, o pûr che a contegnin nons di lûc, di feminis, di oms dal Friûl. Cetancj autôrs in dut il mont a àn scandaiât chestis relazions e a ’nd àn scrit monografiis, articui, saçs e recensions.
Dut câs nol è simpri facil cjatâ fûr chescj materiâi e duncje dâ rispuestis a cui che al vûl capî miôr chel leam fuart jenfri Pasolini e il Friûl, il furlan e i furlans. Par rispuindi a chestis esigjencis di studi e di ricercje, inte suaze di un acuardi jenfri il Centri Studis “Pier Paolo Pasolini” e la Societât Filologjiche Furlane al è stât svilupât un impuartant progjet, pensât e metût adun di Pier Giorgio Sclippa, che al à puartât a la realizazion di www.pasolinibibliografiafriulana.it, il sît internet cuntun data base simpri in inzornament, che al conten schedis bibliografichis une vore aprofondidis e lis relazions che a conventin par identificâ cun precision lis fonts: cussì par esempli si pues savê cuant e dulà che Pasolini al à doprât i pseudonims Pieri Fumul o San Pieri, o ben cualis che a son stadis lis primis recensions di “Poesie a Casarsa”, dulà che a son stadis publicadis la prime volte e cualis che a son lis edizions sucessivis, tropis copiis che a son stadis stampadis e se cualchi biblioteche e conserve des copiis cun dediche autografe dal autôr.
La date che e je stade sielte pe presentazion dal sît e à un significât precîs: di fat ai 14 di Lui dal 1942 la “Anonima Arti Grafiche” di Bologne e finive di stampâ pe “Libreria Antiquaria” di Mario Landi la racuelte di “Poesie a Casarsa”: 80 agns dopo, e tal an che al cole il centenari de nassite di Pasolini, il Centri Studis e la Societât Filologjiche a àn volût celebrâ chest aniversari dopli cu la presentazion di un imprest cetant impuartant.