La Societât Filologjiche Furlane e à il plasê di invidâUs a viodi la mostre des fotografiis di Gian Piero Deotto inte Sale consiliâr di Palaç Locatelli a Cormons (jentrade di vie Imbriani e di vie Matteotti) fin ai 15 di Mai.
Oraris:
vinars e sabide da lis 4 dopomisdì a lis 7 sotsere
domenie di matine da lis 10 a misdì e da lis 4 a lis 7 sotsere
Nissun puest come la spice de mont Quarine nol permet di cjapâ dentri dai nestris voi il Cuei, chel maraveôs paisaç culinâr che partint des Prealps sot des grandis monts Juliis si slargje jenfri i cors dal Judri e dal Lisunç. Une gnove vore fotografiche che i à domandât al autôr (miedi in pension e fotograf par passion) un an intîr di lavôr. Il Cuei (Collio par talian, Brda par sloven) al è un teritori unic e straordenari, no dome dal pont di viste naturalistic ma ancje storic e culturâl, che al ten dentri intun lis trê animis slovene, taliane e furlane e se une volte al jere traviersât de Curtine di fier, vuê al è in corse invezit viers il ricognossiment Unesco tant che patrimoni transfrontalîr de umanitât.
La mostre e je inmaneade de Societât Filologjiche Furlane e dal Comun di Cormòns inte suaze dal progjet "Sine Finibus" promovût de Deputazion di Storie Patrie pal Friûl cu la poie de Regjon Autonome Friûl Vignesie Julie e e jentre intes manifestazions pe Fieste de Patrie dal Friûl.