Ai 27 di Otubar al è stât firmât in Cjasa Ascoli a Guriza il protocol di intese tra la Societât Filologjiche Furlane e la Union dai Grops Folcloristics dal Friûl Vignesie Julie.
Za fa doi agns il sodalizi che al met adun i grops folcloristics regjonâi al jere jentrât inte preseose sede di Cjasa Ascoli; a vuê chest gnûf acuardi al infuartìs ancjemò di plui lis colaborazions tra la Filologjiche e il folclôr furlan.
La plui grande novitât e rivuarde propit la jentrade a la struture di vie Ascoli 1, sede da la Filologjiche par Gurizan e da la Union. Cul mês di Novembar al incrès cetant l’orari di viertidure pal public: dal lunis a la joibe da lis 10 a matine fin a misdì e mieç e da lis 3 e mieze a lis 6 dopomisdì; il vinars da lis 10 a matine fin a misdì e mieç.
Cussì al sarà plui timp par visitâ la cjase li ch’al nassè Graziadio Isaia Ascoli, cu la esposizion permanent “Le lingue di Gorizia” (che di resint i tescj a son stâts voltâts ancje par furlan, todesc, sloven e inglês), la biblioteche da la Filologjiche, cul fonts Ussai-Lasciac, e la sezion gurizane di Italia Nostra.
Al è un invistiment cetant impuartant, di bande da la Filologjiche e da la Union, che al prepare lis iniziativis che a saran inmaneadis pal grant apontament dal 2025, cuant che Guriza e Gnova Guriza a saran capitâls europeanis de culture. Ma al è ancje un segnâl fuart di condivision dai spazis tra istituzions culturâls, che al vûl dî “metisi in rêt” par colaborâ in maniere concrete sui progjets condividûts. Di fat, in atuazion dal protocol che al è stât firmât, si previôt di meti in vore insiemi azions gnovis e impuartantis e tra chestis la documentazion, la catalogazion e la valorizazion dal patrimoni culturâl folcloristic regjonâl.
La ambizion e je chê di meti sù un archivi digjitâl da la danze e da la musiche popolâr, ma ancje di racuei la documentazion sui costums dai diferents bai. Il progjet al podarà disvilupâsi ancje cu la redazion di bibliografiis specifichis su lis danzis, lis musichis e i grops folcloristics e cu la organizazion di seminaris, cunvignis e iniziativis didatichis pes scuelis furlanis.
Il pont di riferiment pe racuelte dai materiâi e pe lôr catalogazion e consultazion in rêt e sarà la Biblioteche da la Filologjiche, une biblioteche ricognossude di interès regjonâl e di riferiment pe comunitât furlane.
Comentant l’acuardi, il president da la Filologjiche, Federico Vicario, al à rimarcât la impuartance da la colaborazion: “Fâ rêt, colaborâ jenfri lis associazions e ju istitûts culturâls che a lavorin a pro dal Friûl al è pardabon impuartant e simpri plui necessari. Cemût che o vin inviât di cetancj agns la colaborazion a Udin cun diviersis istituzions culturâls che a àn sît in Palaç Mantiche a Udin, chest gnûf acuardi al va te stesse direzion ancje chi a Guriza in Cjasa Ascoli, e cussì o contìn di fâ in curt ancje in Friûl di soreli a mont te sede di Pordenon”.
Une vore content dal acuardi il president de Union, Claudio Degano, che al à pandût la sô “sodisfazion personâl e di ducj i grops folcloristics dal Friûl Vignesie Julie par cheste colaborazion che e permetarà di valorizâ inmò di plui il patrimoni culturâl dai nestris grops in gracie des competencis de Societât Filologjiche Furlane”.