In continuitât cul an passât, la edizion 2023/24 di Olmis, il diari “torzeon” de Filologjiche, al propon une gnove cerce di contis popolârs di tradizion orâl, chel grant tesaur che al custodìs la memorie e la anime stesse de nestre int. Si trate di un patrimoni di leteradure popolâr tirât sù di studiôs e ricercjardôrs a partî de seconde metât dal Nûfcent, un patrimoni che, publicât de Societât Filologjiche Furlane in passe vincj volums, si cjatilu cumò ordenât e dispunibil ancje in rêt.
Dongje dal diari e je stade metude in pîts ancje une mostre torzeone dai dissens fats dai ilustradôrs di cjase nestre, che a insiorin lis contis su lis creaturis mitichis che a popolavin i nestris boscs e lis nestris monts: il maçarûl, il guriut, il tartarut, lis aganis, la strie, l’orcul...
Fin ai 29 di Setembar la mostre si pues viodile in Cjase Ascoli, sede de Societât Filologjiche Furlane in vie Ascoli 1 a Gurize.
Orari di visite: di lunis a vinars 10.00-13.30 e 15.00-17.30
Jentrade libare