Ai 10 di Dicembar di chest an la Societât filologjiche furlane e à firmât dôs convenzions, cu la Associazion culturâl bisiache e cu l’Istitût di storie sociâl e religjose di Gurize, pe valorizazion digjitâl dal patrimoni culturâl dal Gurizan. Lis convenzions, che a son stadis firmadis dai presidents Federico Vicario e Ivan Portelli, a previodin di digjitalizâ e cjamâ in linie rivistis e libris publicâts di bande dai doi istitûts lisuntins di culture.
In particolâr, l’acuardi jenfri la Associazion culturâl bisiache e la Filologjiche al jentre tal progjet “Cultura in rete”, finanziât de Regjon Autonome Friûl Vignesie Julie cun fonts statâi dal Ministeri dal Lavôr e al previôt la digjitalizazion par intîr de riviste “Bisiacaria”, che e jentrarà tal
sît des Rivistis Furlanis (www.rivistefriulane.it), e de schirie dai “numars unics” dedicâts ai paîs dal Tiritori publicâts in ocasion dai congrès de ACB. O fevelìn in dut di passe 5.200 pagjinis, par un totâl 522 articui.
La convenzion jenfri l’Istitût di storie sociâl e religjose di Gurize e la Filologjiche e jentre invezit dentri dal
progjet “Identità Culturale del Friuli”, che al cjape dentri i istitûts culturâi plui impuartants dal Friûl. In gracie di chest progjet a saran a disposizion dai utents dal web cetancj libris publicâts dal ISSR, che dispès no si ju cjate ator, par esempli i trê volums “I cattolici isontini del XX secolo” o i libris su lis culturis tal Gurizan, o chei sul vescul Carlo Michele d’Attems e tancj altris ancjemò. Ancje in chest câs o fevelìn di passe 5.000 pagjinis.
«O fasìn un altri pas indevant tal meti sù une rêt di istitûts culturâi furlans – al declare il president de Filologjiche Vicario – un progjet che za di cualchi an al viôt impegnade la nestre Societât e che in gracie des gnovis tecnologjiis al rint plui facil condividi materiâi che a rivuardin la nestre regjon in particolâr».
«Progjets di chest gjenar a son fondamentâi pe valorizazion dal nestri teritori – al va indevant Portelli – , al è impuartant rivâ a condividi cun tancj di lôr i risultâts dai studis puartâts insom in gracie di une consultazion facile e svelte».