Ai 25 di Otubar al è mancjât il prof. Cornelio Cesare Desinan, grant studiôs di toponomastiche furlane e colaboradôr storic de Societât Filologjiche.
Al jere nassût a Piran, in Istrie, tal 1944 ma o podìn considerâlu un fi adotîf dal Friûl, par vie dai studis che al à puartât indevant cun passion e par vie che al è stât un pont di riferiment par cetancj studiôs di toponomastiche, in regjon e fûr, massime dal 1991 indevant, cu la fondazion dal Centri di Toponomastiche.
Tal 2010 la nestre Societât i à dedicât il volum Il mestri dai nons, vignût fûr par cure di Franco Finco e Federico Vicario inte golaine dai "Cuaders di toponomastiche furlane": une racuelte di contribûts in so onôr pai siei 65 agns.
Il professôr Desinan al è stât autôr di cetancj saçs sui Numars Unics, su lis rivistis sociâls e in altris oparis de Filologjiche e no dome.
Lu ricuardìn cuntun percors di leture di cualchidun dai siei scrits, che si puedin lei e discjamâ jentrant tal link in cheste pagjine.