Ai 21 di Zenâr al è mancjât bonsignôr Duilio Corgnali. Plevan di Tarcint e anime de ricostruzion dal Friûl dopo dal taramot dal 1976, al è stât diretôr dal periodic de Arcidiocesi di Udin «La Vita Cattolica» e fondadôr di Radio Spazio 103.
Al è stât simpri a pro de lenghe furlane inte liturgjie e al à puartât indevant cetantis bataiis, come chê pe Leç 482 dal 1999, che e ricognòs la lenghe furlane a nivel statâl.
Al è stât ancje coordenadôr de comission interdiocesane pe traduzion dal Messâl roman in marilenghe: ai 24 di Novembar dal an passât al à cjapât part al incuintri "Une lenghe par preâ", inmaneât de Societât Filologjiche Furlane par clamâ adun il mont de culture furlane dopo che la CEI no veve aprovade la traduzion dal Messâl in lenghe furlane.
O pandìn il nestri ringraciament pal so grant impegn e lu ricuardìn propit cul so intervent in chê ocasion, che si pues tornâ a viodi tal barcon achì parsore, tacant dal minût 54:30.