Andreina Nicoloso Ciceri (Buie 1920 - Udin 2000) si presente ai fruts:
«O soi mestre, critiche leterarie, etnolighe. O fâs ricercje di archivi e diretamentri sul teritori furlan.
Di bessole e cul gno om Luigi Ciceri o rivi in ducj i paîs dal Friûl. Mi soi adatade ai lûcs, a lis circostancis, ai informadôrs, partecipant aes celebrazions religjosis, fiestis, rîts da la semine e de racuelte, fotografant e documentant cun informazions.
Mi impegni par ch’e continui la golaine di Contis Popolârs Furlanis, o partecipi a cunvignis e a trasmissions radiofonichis par dâ vôs cun rigôr a la culture furlane.
O soi vicepresidente de Societât Filologjiche, o dirêç lis rivistis «Sot la Nape» e «Strolic Furlan».
O scrîf plui di sîscent articui, ma par cognossi e studiâ il Friûl tu puedis cjatâ bon materiâl ta chescj tescj: Il Carnevâl in Friûl, Antologjie de leteradure furlane, Tradizions popolârs in Friûl, publicâts de Societât».