La Societât Filologjiche Furlane, in colaborazion cu la "Accademia della Crusca" di Florence, il Dipartiment di Lenghis (DILL) de Universitât dal Friûl e altris ents dal teritori, e inmanee pal 2026 une cunvigne di gjeografie lenghistiche e dialetologjie taliane che e à par titul: Dialetti e lingue di minoranza: tra localizzazione e globalizzazione. La cunvigne e vignarà ospitade dal Comun di Sapade, un lûc li che e je za une biele tradizion di incuintris su la lenghistiche di contat, la sociolenghistiche, la gjermanistiche e la lenghistiche alpine. La cunvigne si fasarà inte sale conferencis dal Museu etnografic “Giuseppe Fontana” di Cime Sapade dai 17 ai 20 di Jugn dal 2026.
I relatôrs che a cjaparan part a la cunvigne, che a vegnin di dute la Italie, a son selezionâts dal Comitât sientific de cunvigne. A fasin part dal Comitât Paolo D’Achille (President de "Accademia della Crusca" - Universitât Roma Tre), Carla Marcato e Fabiana Fusco (Universitât dal Friûl), Annalisa Nesi (Universitât di Florence), Kevin De Vecchis (Universitât di Pisa) e Sergio Lubello (Universitât di Salerno). Intes sessions de cunvigne, une a buinore e une daspomisdì di ogni zornade, a vignaran presentâts intervents sul contat e la variazion lenghistiche tra fevelis e dialets storics de Italie; si lassarà la peraule in particolâr a studiôs e ricercjadôs zovins, clamâts a presentâ i risultâts e lis prospetivis des lôr ricercjis. Intune session, in particolâr, si fevelarà des comunitâts gjermanofonis dal arc alpin.
Inte prime circolâr, che e je publicade in cheste pagjine, si cjatin plui informazions sui argoments e su cemût partecipâ.