La Societât Filologjiche Furlane e poie la produzion del Teatri Stabil Furlan in onôr di Renato Appi.
Il spetacul teatrâl, cul nevôt Andrea Appi, Maria Ariis e lis musichis dal vîf di Aldo Barzan, al rive a Pordenon vinars ai 27 di Setembar aes 8 e mieze di sere tal Teatri Verdi.
I biliets si vendin in bilietarie e on-line; intîr €10, ridot U26 €5
Bilietarie dal Teatri Verdi: dal lunis al vinars 16.00- 19.00 / sabide 10.00-12.30 e 16.00-19.00
Par informazions: infoline 0434 247624
Renato Appi (1923-1991) al è stât un dramaturc, poete e animadôr une vore atîf di Cordenons e al à contribuît ae nassite e ae cressite di tantis realtâts culturâls de regjon.
Tal 2023 al varès fat cent agns, une ocasion par visâsi de sô opare e par tornâ a proponi temis, sintiments e ideâi.
Chest compit impegnatîf i è stât dât a un nevôt di Renato, Andree, cognossût plui pes sôs frecuentazions intai teritoris sbrissôs dal cabaret che pes sôs competencis poetichis e leterariis.
Andree al domande consulence ae sô femine, ancje jê atore ma cuntun çucul dûr di ispirazion pure ancjemò tacât salt te sô cussience.
Dut câs, di subit o viodìn che la opare dal barbe, cu la sô scletece potente, e je daûr a slargjâ lis crepaduris che si traviodin intai mûrs dal lôr matrimoni, scjafoiât te palût ferme des abitudins, cul pericul di fâ jessî fûr il flum dai sintiments scuindûts masse a dilunc. In cheste maniere, devant de potence de Art che e pant, e mostre e che e fâs inamorâ de Vite cualsisedi che al rivi a preseâle, i doi si scuvierzin crots, e salacor ancjemò inamorâts.