Dut un 'siminament pe riprese des ativitâts formativis dal Docuscuele – Centri regjonâl di documentazion, ricercje e sperimentazion didatiche pe scuele furlane cun sede li de Societât Filologjiche – che dal 2016 al è pont di riferiment par ducj i docents interessâts al insegnament de lenghe furlane.
I cors di formazion, sore nuie e increditâts daûr des liniis vuide dal MIUR, a son tignûts di professioniscj e di esperts dal setôr, in colaborazion cul Ufici Scolastic Regjonâl, cu la Universitât dal Friûl e cu la ARLeF – Agjenzie Regjonâl pe Lenghe Furlane.
Pal 2022 a son za stâts inviâts doi cors: SCRIVI, par imparâ a scrivi par furlan inte maniere juste, e CJANTÂ, pe didatiche musicâl in lenghe furlane. Cheste ultime propueste e à stiçât l’entusiasim dai insegnants, tant che in mancul di 24 oris de publicazion de gnove si à rivât al massim dai 25 iscrits. Viodût il grant numar des domandis, e je stade metude in pîts une seconde edizion, che e tacarà vinars ai 25 di Fevrâr. Il percors al intint di ufrî imprescj e propuestis par doprâ lis cjantis pe infanzie, che a sedin chês tradizionâls o ancje chês di autôr, par ativitât di didatiche musicâl che e puarti i arlêfs a sperimentâ lis fondis de scriture musicâl, in plui di meti in zûc lis lôr capacitâts di scolte, di intonazion, di memorie e di coordenament ritmic e motori. Di là dai laboratoris pratics, i insegnants a vignaran vuidâts inte produzion di un lôr progjet personâl, a tacâ di une cjante a sielte libare.
Ancje la cuinte edizion di “Scrivi”, dute su plateforme informatiche Moodle, e je viodude cun plasê, stant che, ore presint, lis domandis di iscrizion a son uns novante: il percors, disponibil dal prin di Fevrâr, al restarà viert fin ai 31 di Dicembar e si podarà notâsi fin ai 30 di Novembar dal 2022. Il cors al intint dâur ai docents lis competencis necessariis di gramatiche – fonologjie, morfologjie e sintassi – par imparâ a doprâ inte maniere juste la lenghe furlane scrite. In plui dai elements di grafie e di gramatiche, vie pes lezions si impararà ancje alc di plui sul cont de storie de lenghe, de semantiche, de linguistiche comparade, de toponomastiche e de storie dal Friûl.