La Struture Programs Talians de Sede Rai pal Friûl Vignesie Julie e presente, martars ai 24 di Otubar aes 6 sore sere intal Salon d'onôr di Palaç Mantica, sede di Udin de Societât Filologjiche Furlane, il documentari di Antonia Pillosio Friûl tal Mont une Patrie cence confins. Pe ocasion al sarà proieât un estrat dal lavôr.
Ce Ent Friûl tal Mont nus consegnino i setante agns di storie che l’Ent al à vivût de sô nassite fintremai vuê? In ocasion di cheste ricorence, il documentari, prodot de sede RAI FVJ, al tocje cualchidun dai moments plui significatîfs dal percors di chest Ent prestigjôs.
La conte, compagnade di Loris Basso, president dal EFM e di Federico Vicario, president de Societât Filologjiche Furlane, e tache dai prins pas di Friûl tal Mont, che a rimontin al 1953, par po finî cuntune voglade sul avignî. La narazion e vignarà insiorade di documents inedits gjavâts fûr di fotografiis, regjistrazions radiofonichis, filmâts amatoriâi e documents storics dal Archivi storic dal Ent Friûl tal Mont. Aes intervistis a rapresentants dai Fogolârs Furlans tal forest, si zontaran ancje lis testemoneancis di Bruno Pizzul e Dino Zoff.
Il documentari par intîr inte version par furlan al sarà mandât in onde su la Tv par furlan canâl 810 Rai3 Bis martars ai 24 di Otubar aes 9.20 di sere e in repliche vinars ai 27 di Otubar, simpri aes 9.20 di sere. La version par talian e sarà mandade in onde sul canâl RAI3 Bis domenie ai 12 di Novembar aes 9.15 a buinore e in repliche miercus ai 15 di Novembar aes 9.15 di sere.