Dentri dai 30 di Zenâr, tancj gjenitôrs a àn di sielzi la scuele pai lôr fruts, cu la pussibilitât di insiorâ il lôr percors educatîf cul insegnament de lenghe furlane.
Cheste sielte e zovarà ae cressite dai fruts, slargjantjur ancje la vision dal mont.
Ta cheste fase di svicinament ae lenghe, la preparazion, la esperience e lis ideis a son fondamentâls par podê strissinâ i fruts intun mont di scuvierte, di condivision e di zûc.
Tal sît dal Docuscuele - Centri regjonâl di documentazion, ricercje e sperimentazion didatiche pe scuele furlane, si puedin cjatâ centenârs di progjets metûts in pîts dai docents vie pai agns.
Cun di plui, il Centri al prodûs ancje publicazions specifichis, realizadis cu la consulence di esperts e professioniscj dal setôr e pal plui daûr de metodologjie CLIL, di mût che la lenghe furlane e sedi un mieç par imparâ ancje altris dissiplinis.