Inte suaze de rassegne “I luoghi del Tiepolo” miercus ai 5 di Març – zornade che a Vignesie al nassè Zuanbatiste Tiepolo – aes 6 sore sere in Palaç Mantica, sede de Societât Filologjiche Furlane, si presente il libri Giandomenico sogna / Il sium di Zuandomeni, ilustrât di Barbara Jelenkovich cui tescj di Giovanna Zordan.
Cuntun grant salt tal timp, il libri nus torne a puartâ te Udin dal Sietcent, une citât li che i artiscj Zuanbatiste e Zuandomeni Tiepolo, pari e fi, a lavorarin plui voltis par insiorâ cu lis lôr pituris palaçs e glesiis. Inte conte, Zuandomeni al è ancjemò frut e si insumie di deventâ un grant artist, propit come so pari. Intant che al è cun lui in viaç par Udin, al visite ducj i lûcs li che il grant pitôr al à lassât la olme de sô art: il domo, il palaç Patriarcjâl, palaç Caiselli… ma nol sa ancjemò che propit achì, cuant che al sarà grant, al piturarà insiemi cun so pari e il so sium al deventarà vêr!
Il libri al jentre inte golaine di valorizazion dal nestri teritori pensade de Filologjiche Furlane pai fruts e publicade tacant dal 2008 simpri cu lis vivarosis e precisis ilustrazions di Jelenkovich, che cun cheste publicazion e tocje i passe dusinte libris publicâts in diviers Paîs dal mont. I siei lusorôs acuarei a compagnin il letôr dentri de conte, tra la finzion narative e la ricostruzion storiche. La seconde part dal libri e propon aprofondiments specifics, che nus permetin di discuvierzi alc di plui su la biografie dal Tiepolo e su la tecniche dal afresc. Par finî, la autore dai tescj Giovanna Zordan nus cjape pe gole cuntune dolce ricete di chei timps.
Par slargjâ a lis gnovis gjenerazions la sensibilitât viers il plurilinguisim, ancje il libri sul Tiepolo al jes in dôs versions: une che e met adun il talian, il furlan, il todesc e l’inglês e chê altre che e sostituìs l’inglês cul sloven par meti insiemi lis cuatri lenghis che si fevelin tal Friûl Vignesie Julie.
La publicazion e nas in colaborazion cul Museu Diocesan di Udin, li che lis autoris a àn puartât indevant lis lôr ricercjis.
Cun di plui, lant daûr dal libri, sabide ai 8 di Març aes 3 daspò misdì il Cjistiel di Udin, l’Oratori de Puritât e il Museu Diocesan e Galariis dal Tiepolo a vierzaran lis puartis a une visite speciâl pes fameis ae scuevierte des oparis di Zuan Batiste Tiepolo cjaladis a traviers dai voi dal fi, il piçul Zuan Domeni. La visite e dure 2 oris.
La jentrade ae presentazion dai 5 di Març e je libare e a gratis.
La visite vuidade dai 8 di Març e coste € 5 pai fruts (visite + jentrade) e € 20 pai grancj (visite + jentrade
in Cjastiel, Museu Diocesan, Cjase Cavazzini, Museu Etnografic dal Friûl
valevule fin ai 15 di Març). I puescj a son limitâts e la prenotazion obligatorie:
tel. 345 2681647, didatticamusei@comune.udine.it