Une persone gentîl cun ducj, simpri gjenerose cui studiôs de civiltât furlane, gjeniâl tal viodi leams fra diviarsis culturis, amie di Pasolini e di tancj atrîs omps di culture par di cà e par di là des Alps.
Chest il ricuart di Andreina Ciceri vignût fûr su «Sot la Nape», la riviste de Filologjiche che par agns e veve gjoldût de sô colaborazion, simpri atente e precise, in tancj articui e recensions, e ancje de sô direzion.
Fie de scritore Maria Forte e di Prosdocimo Nicoloso, e jere nassude a Buie ai 11 di Dicembar dal 1920.
Laureade in Letaris a Padue, e insegnà te mediis e tes superiôrs a Udin.
Cul so om Luigi Ciceri e jere a stâ a Tresesin, tune cjase li che tal timp a meteri dongje une colezion une vore significative di oparis d'art, manuscrits, libris e materiâi etnografics: a jerin il riflès di une vite di lavôr di ricercjis puntuâls e documentadis su lis tradizions popolârs, l'etnografie, la leterature, l'art e di tancj studis puartâts indenant simpri tal grim de Filologjiche (la golaine di "Racconti popolari friulani" le à screade jê).
E je mancjade a Udin ai 24 di Mai dal 2000.
Test di Gabriele Zanello, ritrat di Vera De Tina
La nestre int, Societât Filologjiche Furlane 2019