Pari di Mortean, mari di Navarons, Novella Aurora Cantarutti e jere nassude za fa cent agns, ai 26 di Avost dal 1920 a Spilimberc.
I studis le puartarin a Milan e a Rome, biel che il so lavôr di insegnant di Letaris le impegnà la plui part tes scuelis di Udin.
Pre Josef Marchet le sburtà a scrivi par furlan e jê no bandonà mai la lenghe di sô mari, ancje se e componè qualchi scrit te koinè; Pasolini le compagnà tai prins pas de sô poesie, vierzintle a dimensions gnovis.
Te famee de nestre Societât e puartà indenant cun umiltât il so lavôr cidin e perseverant su lis contis e lis liendis di tradizion orâl: cun rispiet profont, finece filologjiche e sensibilitât di femine fuarte, tirant dongje un patrimoni monumentâl e preziôs, si è metude al servizi di un mont che al jere daûr a dispierdisi.
E murì a Udin ai 20 di Setembar dal 2009.
Test di Gabriele Zanello, ritrat di Vera De Tina
La nestre int, Societât Filologjiche Furlane 2009
Condividi
Peravali',
segnus di gent tal timp,
revòcs di robi'
sun tuna cjera
Dute la sô vite Novella Cantarutti le à spindude a cirî peraulis: chês des sôs poesiis e des sôs prosis, plenis di lûs, di vite, di umanitât; e chês de int, sclapadis su lis pieris des cjasis de Val Midune o masanadis te aghe dal Tiliment
Links