L’Editoriâl Il Friuli e la Societât Filologjiche Furlane, in colaborazion cu la Universitât dal Friûl e cu la Arlef, cul patrocini dal Consei regjonâl e dai Comuns di Codroip, Pucinie e Talmassons, dal Ent Friûl tal Mont e dal Comitât Unpli Fvj, cu la poie di Confartesanât Udin, di Confcumierç Udin e di Bancje TER, a bandissin la prime edizion dal premi leterari par ricuardâ la figure di Giacomo Bonutti – plui cognossût tant che Jacum dai Zeis, muart che al è un secul, ai 5 di Setembar dal 1921 – e di recuperâ e prudelâ i valôrs de culture popolâr furlane, che Jacum al è stât so protagonist emblematic.
Si partecipe cun massime trê contis curtis e ineditis, su la fate dal spirt che al à animade la creativitât di Jacum dai Zeis e di caraterizazion umoristiche.
Lis lenghis ametudis a son il furlan e il talian.
Dutis lis informazions a son tal bant che si pues discjamâ aes vôs download in cheste pagjine, insiemi cul model di partecipazion.
Lis voris a àn di rivâ dentri dai 15 di Avrîl dal 2022, la premiazion si le fasarà pe Setemane de culture furlane, tal mês di Mai.