Il film L'Atlante della Memoria, pe regjie di Dorino Minigutti, al è ispirât ae vite e ae opare dal lenghist Ugo Pellis (1882-1943) nassût a Flumisel, ch'al è stât tra i paris fondadôrs de Filologjiche e sul principi dal ’900 al à traviersât l'Italie par fâ une des plui impuartantis inchiestis dialetologjichis mondiâls, chê pal Atlant Lenghistic Talian (ALI): par documentâl al miôr il materiâl lenghistic, al à fat plui di 7.000 fotografiis e cussì al à metût sù un archivi ecezionâl ch'al conte par imagjinis la vite de Italie ‘minôr’ – massime Friûl e Sardegne – dilunc dai agns Vincj e Trente dal Nûfcent.
A son propit chestis fotografiis che ur interessin a Lorenzo, il zovin protagonist che si met in viaç jenfri Friûl e Sardegne ae ricercje di personis che il Pellis al à vût fotografât e che a son ancjemò in vite; di chi i ven une riflession sul sens de memorie in compenetrazion cu la lenghe, l'identitât e la diviersitât, l'amôr e la muart.
Il docufilm al va in onde domenie ai 10 di Zenâr aes 9.15 a buinore su Rai 3, in riduzion televisive dentri de programazion regjonâl setemanâl; la repliche e sarà miercus ai 13 di Zenâr aes 21.20 di sere su Rai 3 bis (cjanâl 103).