Il zovin Lorenzo al cjate par câs une schirie di fotografiis fatis dal lenghist Ugo Pellis (1882-1943), che sul principi dal Nûfcent al traviersà l'Italie par realizâ une des plui impuartantis indagjins dialetologjichis mondiâls: l'Atlant Lenghsitic Talian (ALI). Cun chê di tornâ tai lûcs des fotografiis e di cirî lis personis inmò in vite, Lorenzo al partìs par un viaç su lis olmis di Pellis e dal Friûl al rive in Sardegne, une tiere che il Nestri al à vût visitât plui voltis pe sô ricercje.
Cussì al tache il film-documentari l'Atlante della Memoria, pe regjie di Dorino Minigutti, realizât tal 2019 par celebrâ il Centenari de Societât Filologjiche Furlane e che cumò al è vignût fûr in DVD (dutis lis informazions si cjatin tal link in cheste pagjine).
Il progjet pe realizazion dal Atlant al nassè tal 1924 li dal Istitût pal ALI de Universitât di Turin e par iniziative de Societât Filologjiche Furlane. Il comitât di redazion al nomenà racueidôr unic Ugo Pellis, un dai paris fondadôrs de Filologjiche che cussì al tacà un viaç che par disevot agns lu à puartât a percori dute l’Italie rivant ancje in Istrie e Dalmazie, che a jerin teritoris talians. In chei agns Pellis al à puartât insom plui di 700 inchiestis jemplant un milion e mieç di schedis. Dilunc de sô ricercje al à insiorât lis intervistis lenghistichis cun passe 7.000 fotografiis che, conservadis de Societât Filologjiche Furlane tal Fonts Pellis, a son un document straordenari par viodi une Italie che no je plui, sfantade e glotide de industrializazion e dal progrès economic sclopâts subit dopo de vuere.