La Societât Filologjiche Furlane e je jentrade inte Union Federâl des Nazionalitâts Europeanis (FUEN), la federazion che e lavore a pro de tutele e de promozion de identitât, de lenghe, de culture, dai dirits e des tradizions des minorancis europeanis e e da vôs aes minorancis intes organizazions internazionâls, inte Union Europeane, intal Consei de Europe, intes Nazions Unidis e intal OSCE. La FUEN e cjape dentri passe 100 organizazions di 26 paîs europeans in rapresentance des minorancis nazionâls, nazionalitâts e grops lenghistics autoctons de Europe.
La amission de Societât Filologjiche e je stade votade a la unanimitât di bande de Assemblee dai delegâts di sabide ai 9 di Setembar, tal Congrès anuâl de FUEN che si è davuelt a Pécs in Ongjarie dai 7 ai 10 di Setembar. La Societât e je stade rapresentade dal diretôr, Feliciano Medeot, che ur à fevelât ai partecipants de storie e des ativitâts principâls dal sodalizi: organizazion di events e iniziativis, ativitât editoriâl, gjestion de biblioteche di riferiment pe comunitât lenghistiche furlane e dal Centri regjonâl di documentazion, ricercje e sperimentazion didatiche pe scuele furlane (DocuScuele).
Cetantis a son lis resons che a àn sburtât la Filologjiche a domandâ di jentrâ te FUEN. Come che al à ricuardât Medeot tal so intervent “prin di dut par rapresentâ la comunitât furlane, la seconde comunitât lenghistiche taliane pal numar di che chei le fevelin” e, cun di plui, la considerazion che “la tutele dai dirits de comunitât lenghistiche furlane e sarà dal sigûr judade de colaborazion e dal confront cun altris realtâts europeanis”.