E je tachade, su lis pagjinis dal setemanâl de Diocesi di Concuardie-Pordenon «Il Popolo», une gnove rubriche che une volte al mês, in colaborazion cu la Societât Filologjiche Furlane, ur propon ai letôrs di soreli a mont iniziativis e apontaments, un barcon viert sul mont de culture in marilenghe.
Sul numar ch'al ven fûr ai 26 di Jugn si fevele de Bibliografie furlane di Pasolini, un progjet metût in vore de Societât in colaborazion cul Centri Studis Pier Paolo Pasolini di Cjasarse pe realizazion di un sît internet dulà cjamâ dute la produzion dal autôr in lenghe furlane o ambientade in Friûl, a mieç di une bibliografie ch'e cjapi dentri no dome lis oparis "di" Pasolini ma ancje lis oparis "su" Pasolini.
Il progjet al jentre inte suaze di un acuardi firmât dai presidents des dôs istituzions culturâls, cul obietîf di promovi cunvignis, studis e ricercjis di interès bibliografic su la figure e la opare dal Poete.