Sul finî di Avrîl si varà di tornâ a fâ la convenzion pes trasmissions RAI in lenghe furlane.
La Assemblee de Comunitât Linguistiche Furlane (ACLiF), che e met adun 128 comuns de regjon, e à inmaneât par sabide ai 13 di Març aes 10.30 di matine une cunvigne a distance par fâ un cuadri des trasmissions radiotelevisivis pes lenghis minoritariis in Italie e viodi cualis che a son lis pussibilitâts di svilup de situazion dal furlan. Un confront a larc, par podê meti in suaze la situazion dal Friûl intun contest nazionâl, cjapant in considerazion ancje lis comunitâts slovene, todescje, ladine, francese e sardegnole.
La cunvigne, cul patrocini de Regjon Friûl Vignesie Julie, de ARLeF e de Societât Filologjiche Furlane, e cu la colaborazion dal Corecom, e ven trasmetude in direte streaming sui canâi Youtube e sul profîl Facebook de ACLiF (frache su un dai link).
A intervegnin personaçs di alt nivel dal gjornalisim e de RAI, e cussì ben de aministrazion regjonâl:
• Ferruccio Sepe, a cjâf dal Dipartiment pe informazion e pe editorie de Presidence dal Consei dai Ministris
• Stefano Luppi, diretôr Relazions istituzionâls de RAI
• Antonella Eloisa Gatta, vicepresidente dal Corecom FVG
• Guido Corso, diretôr de sede RAI di Triest
• William Cisilino, diretôr de ARLeF
• Martina Repinc, responsabil de struture programs in lenghe slovene de RAI di Triest
• Vittorio Longati, diretôr de sede RAI di Bolzan
• Stefan Pescollderungg, caporedatôr dal Tg RAI Ladinia (TraiL);
• Luciano Caveri, assessôr regjonâl de Val d’Aoste (za responsabil de struture programs RAI di Aoste)
• Francesco Angelo Siddi, president di Confindustrie Radio Televisions (za conseîr Corerat de Sardegne)
• Pierpaolo Roberti, assessôr regjonâl aes Autonomiis locâls dal FVG
• Piero Mauro Zanin, president dal Consei regjonâl FVG
La discussion e sarà regolade dal president ACLiF Markus Maurmair e de conseire Ornella Comuzzo.
Informazions sul sît www.aclif.it