Cjasa Ascoli, sede di Gurize de Societât Filologjiche Furlane, e sarà la sede operative de prime edizion di Lenghis, il festival dal teatri des lenghis minoritariis inmaneât dal Teatri Stabil Furlan cu la poie de Regjon Friûl Vignesie Julie, di Promoturismo FVJ, dal Ent Regionâl Teatrâl e dal Comun di Gurize, in colaborazion cu la ARLeF.
L'apontament al è dai 23 di Otubar al prin di Novembar cun 18 spetacui, 8 compagniis teatrâls e 30 artiscj che a vegnin di cinc paîs de Europe: Italie, Slovenie, Cravuazie, Olande e Spagne. Lis lenghis che o scoltarìn a son 7: furlan, sart, frison, catalan, albanês e, tant che minorancis de Italie e de Cravuazie, sloven e talian.
Il program al è dividût in trê categoriis di ativitâts: spetacui, laboratoris pai atôrs, incuintris e cunvignis.
A son dôs lis anteprimis dal festival. Martars ai 30 di Setembar aes 8 di sere tal Teatri Nazionâl Sloven di Gnove Gurize al vignarà puartât su la sene il spetacul Tragùdia. Il canto di Edipo di Alessandro Serra, che al sarà recitât in grecanic, une lenghe minoritarie che si fevele ancjemò in cualchi zone di chê che o clamìn "Magna Grecia". Joibe ai 16 di Otubar aes 9 mancul un cuart di sere tal teatri Palamostre di Udin si podarà viodi invezit il spetacul Alla ricerca della lingua perduta scrit di Goran Vojonivić e direzût di Janusz Kica, la seconde part de triologjie ispirade al romanç di Joseph Rot La cripta dei cappuccini.
Il program dal festival par intîr si cjatilu sul sît lenghisfestival.it