Juste un an indaûr, tal mês di Lui dal 2019, par vierzi lis celebrazions dal Centenari di fondazion la Societât Filologjiche Furlane e screave
Cjasa Ascoli a Guriza tant che gnove sede pal Friûl di Jevât.
Inte cjase li ch'al è nassût il glotolic gurizan Graziadio Isaia Ascoli (1829-1907) - che la Societât i è intitulade - la Filologjiche e à metût sù in so onôr la mostre
"Lis lenghis di Guriza", che e presente no dome la vite e la opere sientifiche dal pari dai studis di glotologjie e di lenghistiche comparade in Italie, ma ancje la situazion etnolenghistiche dal Gurizan, la sole aree in dute Europe li che tal cors de storie, fin a la conclusion de prime vuere mondiâl, a àn vivût insiemit lis comunitâts taliane, slovene, furlane, todescje e ebraiche.