O passi l’infanzie e la adolessence a Navarons, te val de Midune, il paîs di mê mari che o ami une vore; il gno lavôr di insegnant, invezit, al è a Spilimberc e a Udin.
La mê prime produzion poetiche e ven fûr tal 1952 e e je il risultât di esperiencis e condivisions di esigjencis inovadoris, pandudis sedi di Pier Pauli Pasolini te "Academiuta di lenga furlana", sedi di pre Josef Marchet.
Tal 1989 o publichi dutis lis mês poesiis intun volum unic cul titul di In polvara e rosa; lis mês prosis a son metudis adun in Sfueis di chel âtri jeir, dal 1997. O colabori par tancj agns cu la Societât Filologjiche Furlane.
O sint afiet pe mê tiere e sensibilitât pe mê int e mi met al servizi di une tradizion antighe che o rispieti, presentant – cemût ch’al dîs il gno amì Gian Paolo Gri – «il contribût plui impuartant dedicât in Friûl a la narative popolâr: un vêr monument a la peraule de sô int»: o publichi Oh, ce gran biela vintura! ..., la racuelte di tescj di tradizion orâl jenfri la Midune e lis valadis.
Il test e il disen a son gjavâts dal diari "Olmis" vignût fûr tal Centenari de Societât Filologjiche Furlane
Condividi
GENT DA LA GRAVA
(Spilumberc)
Li’ gravi’ a’ bévin
il sarègn da l’aga
tal Tilimìnt,
e ta li’ pièri’ strachi’
dal cjscjel
al duàr un altri timp.
Gent da la Grava
ingenoglada in Domo,
là che i arcs
a’ son ali’ di ànzai granc’
e i sans flurîs in coru
intôr l’altâr
a’ vèglin
tuna lûs verda di aga.
Links