Il diari
Ólmis 2020/2021 al è rivât tes scuelis che lu vevin prenotât e al è pront pai fruts, che lu cjataran tal prin dì di scuele.
Al è il nestri auguri par tornâ a tacâ in grant!
La gnove edizion dal
diari torzeon e je un viaç indaûr tal timp in undis fermadis: da lis primis sclesis di vite te preistorie fintremai a la gnot dal orcolat dai 6 di Mai dal 1976.
Sêso pronts par partî? Sêso curiôs di vierzi il vuestri fignestrin su undis moments de storie dal Friûl che us fasaran scuvierzi un teritori siôr di testemoneancis dal passât, us daran biei sugjeriments par lâ plui insot te cognossince o par lâ a viodi cui vuestris voi lûcs straordenaris par bielece e impuartance, us fasaran zuiâ par tirâ a ciment dutis lis vuestris abilitâts, sedi chês creativis che chês logjichis?
E alore cjolêtsi dut il timp par fermâsi in ogni tape e metêt in valîs simpri alc di gnûf, o viodarês che a la fin il viaç al sarà une esperience di no podê dismenteâ: o varês metût lidrîs tal vuestri passât par svolâ libars tal avignî!