Al è daûr a scomençâ un gnûf an di scuele!
Come ogni an, une vore di fruts a cjataran parsore dal banc un amì fidât pront a acompagnâju vie par cheste gnove aventure. O fevelìn dal diari “torzeon” Olmis, une tradizion rivade ae 29me edizion, in gracie di un grup di lavôr che di agns al met dute la sô passion e competence par regalâ emozions simpri diferentis ai arlêfs furlans, cun chê di stiçâju a cognossi e a preseâ la culture, la lenghe, l’ambient e lis tradizions dal Friûl, parcè che no je maniere plui juste di preparâsi al doman e a un mont che al cambie, che no savê cui che o sin e là che o sin a vivi.
Chest an Olmis nus propon une gnove cerce di contis popolârs di tradizion orâl, chel grant tesaur che al custodìs la memorie e la anime stesse de nestre int. Si trate di un patrimoni di leteradure popolâr tirât sù di studiôs e ricercjardôrs a partî de seconde metât dal Nûfcent, un patrimoni che, publicât de Societât Filologjiche Furlane in passe vincj volums, si cjatilu cumò ordenât e dispunibil ancje in rêt.
Adriana Cesselli, Magda e Vittorina Carlon a àn fate une sielte di contis che a tratin lis creaturis mitichis che a popolavin i nestris boscs e lis nestris monts, duncje il maçarûl, il guriut, il tartarut, lis aganis, la strie, l’orcul, che si presentin ancjemò plui vivarôs in gracie de revision stilistiche di Chiara Carminati e dai dissens fats di pueste dai ilustradôrs che di agns a insiorin il diari cui lôr colôrs e ideis.
Dongje de publicazion su cjarte, che e rivarà sore nuie a 15.000 fantats des scuelis primariis, e je stade metude in pîts ancje une mostre torzeone, che e vignarà screade inte suaze di Friuli DOC inte sede di Udin de Filologjiche, par dopo lâ ator pe regjon.